Ceļoj laikā ar tautys apgierba i mūdis mejom
Vēļ tik da 12. maja Latgolys Kulturviesturis muzejā Rēzeknē sadarbeibā ar Modyunis nūvodpietnīceibys i muokslys muzeju apsaverama ceļojūšuo izstuode „Tautys apgierbs i mūde…”, kurei atdora īspieju smolki izpieteit apgierba atteisteibu nu 11. godu symta da myusu dīnu.
11. majā 11:00 muzejs aicynoj iz sasatikšonu ar izstuodis autori – pietneicu Aneti Karlsoni, kurei ir vuokuse, pietejuse i apkūpuojuse materialus izstuodei, nu izstuodi taisejušys Modyunis nūvodpietnīceibys i muokslys muzeja specialistis Inese Jakobi i Laima Garā.
Izstuodi papildynoj ari apgierbi, rūtys i aksesuari nu Latgolys Kultrviesturis muzeja kruojuma i etnografiskuo ansambļa „Rykova” tārpi.
Baltejis Starptautiskuos akademejis Rēzeknis filialis studente Liene Leitāne par izstuodi soka: „Personeigi maņ, īīmūt itymā izstuodē, vysu vaira pīsaisteja taišni eksponātī apgierbi – gon vydslaiku apgierbs i 19. godu symta „turnita” stila tārps nu Modyunis nūvodpietnīceibys i muokslys muzeja kruojuma, gon 20. godu symta 50-tūs godu malnuos vokora suknis, aksesuari i c. nu Latgolys Kulturviesturis muzeja kruojuma. I najauši pīgivu sevi pi dūmys, ka asu suokuse izbūrt sev ocu prīškā gondreiž eistynu skotu – skaista i smolka kundzeite, tārpusīs malnā, gaiseigā suknē, kurai dasprausta kruošņa broša, malnuos samta kūrpēs tik atsagrīzuse sātā nu teatra. Sīvīte īīt ustobā, nūlīk capuri, smolkū šalu, nu rūku izsleid sumceņa i tai leidza biļets nu koncerta… Piec šaļts ustobā nu ceļojuma īsarūn ari veirīts, kurīs izskotā leidzeigs munam dzedam jauneibā – ar mīlesteibys pylnom acim meklej sovu meiļuotū, steidzeigi nūlīk čemodana, iz spīgeļa pamat nu kuldys izjimtū stuņdinīku i… Stuosts var turpynuotīs cytaiž – atejat i atrūnit sovu stuostu laikā storp 11. godu symtu i myusu dīnom!”
Muzeja dorba laiks:
ūtrdiņ, trešdiņ, catūrtdiņ, pīktdiņ – 10:00-17:00
sastdiņ – 10:00-16:00
svātdiņ, pyrmūdiņ – slāgts
Īejis moksa:
Školānim i studentim Ls 0,20;
pīaugušim Ls 0,40;
apvīnuotais bilets vysam muzeja Ls 0,30; Ls 0,70
pyrma školys vacuma bārnim – breiva;
muzejpedagogiskuo nūdarbeiba Ls 0,50;
Karteņā – Vāluo dzelža laika – agrūs vydslaiku latgaļu i sieļu (vydssluoņa) sīvīšu i veirīšu gūda apgierbs nu Modyunis nūvodpietnīceibys i muokslys muzeja kruojuma, foto A.Bondarenko.
