Kai viestej kinys taiseituoji – kina „Pi tāvim aizīt” byus komedeja, kurys pamatā ir stuosts par vyspuorciļviecysku grybu atrost sovys saknis i tyvinīkus, kas ir gona lela problema myusdīnu cylvākam „pasauļs tautu staiguošonys” laikā. Kinys sižetā svareigu lūmu ījam latvīšu rituals – kasgadejī vosorys kopu svātki, iz kurim sasapuļcej vysa saime, i kina reizē ir unikala īspieja paruodeit itū tradiceju ari cytom tautom.

Kina ir stuosts par divdesmitsešgadeigū moskovīti – „buoreni” Ontonu, kurīs tikū atlaists nu dorba i atvalinuots personeigā dzeivē, īsarūn Latgolā, kab atrostu tāvu, kuram vad mirušuos muotis viestuli. Īsarūnūt Rēzeknē, jis sateik sovu liktiņa bīdru – desmitgadeigū Biernānu Pītereiti, kurīs dzeivoj ar sovu babu Broņu, kurei kai pādejū bastionu napaguruse kūp sovu seņču kopus, sūpluok kurim juos dzeivei vēļ ir nūzeime i jāga. Ontons cereibā atrost sovu tāvu treis reizis tyvejūs dzerauņu kopusvātkūs tāloj „pagaisušū dālu”, nu tymā pat laikā jis pasamona izpiļdeit ari Pītereiša tāva lūmu, kurymā sevi najauši – gon na bez Pītereiša viļteibys, ir sevi īcieļs. Juo itū tāva statusu napamat ari nu Mančesterys atbraukušuo Pītereiša muote Anita, bejušuo „Mis Latgola”, kurei vysim stuosta, ka jei Anglejā ir picerejis vadeituoja. Nu dzeivi napīmuoneisi, vīglī i īrostī celi uotri apsaraun… I kinys varūni saimi atrūn na kai syltū kliepi, kurymā pasaglobuot, nu gon bolstūt i aizstuovūt vīnam ūtru sovu dzymtajā zemē.

Kinys idejis i scenareja autore kai ari Latvejis pusis producente ir Franciska Cimare, kurys dorbs „Jārsokys dereiba” Līgys Celmys muzykā i kuora „Kamēr” izpiļdejumā beja vīns nu 2010. goda spilgtuokajim muzykys nūtikumim. Kinys režisors ir Armāns Čilingarjans, kurīs tikū sajiems Armenejis Nacionalū kinobolvu par sovu pādejū kinu „Maršbrosok”, nu Krīvejis pusis producente – Anastasija Birjukova ar vaira kai 30 kinuprojektu pīredzi. Kai kinys konsultants pīsaisteits Pāvels Finns – vīns nu spieceiguokajim Krīvejis scenaristim. Kinys komandā taipat ari dorbojās – operators Andrejs Rudzāts, komponists Juris Kulakovs, ūtrs režisors Harijs Petrockis, izpildproducente Daiga Livčāne, muokslenīks Aivars Žukovskis, skonu režisors Levons Navarsadjans i gaismuotuojs Ģederts Siliņš.

Kinys fiļmiešonys dorbi tiks izsuokti juļa beiguos i byus da augusta beigu. Kinu fiļmēsRēzeknē, Daugovpilī, Modyunis nūvodā i cytur Latgolā, kai ari puora epizodis tops Reigā i Moskovā. Leluokuo daļa kinys akteru byus nu Daugovpiļs pusis. Kinys pyrmizruode paradzāta 2013. goda septembrī.

Kinys pamatfiļmiešonys dorbi nūtiks Latgolā. Kab sataiseitu piec vareibys lobuoku Latgolys muokslenīciskū tālu, lela viereiba byus kopusvātku dokumentiešonai.

Nu, kab nūdrūšynuotu pilnvierteigu Latvejis pusis daleibu projektā, kinys taiseituoji meklej atbolsta īspiejis. Deļ tuo, ka kaids grib atbaļsteit kinu i pasaruodeit kinys titrūs, „Pie tēviem aiziet” komanda byus prīceiga par sevkuru zīduojumu! Vaira dazynuošonys i vaicuojumim par cytim sadarbeibys pīduovuojim pa teleponu: 27791258.

Karteņā – Kopusvātki, foto Kristīne Pokratnīce