Itymā dīnā Škilbanu etnografiskais ansamblis simboliski svieteja sovu 30 godu jubileju i cauri dzīsmem pasateica atbaļsteituojim, izguoja ansambļa viesturis stidzenis, kai ari prīcuojās par sveicienim i draugim.

Škilbanu etnografiskais ansamblis dybynuots 1980. goda rudinī i vysus darbeibys godus ness Latvejā i sābru vaļstīs latvīšu tradiceju viesti. Ansamblī iz itū šaļti dzīž 11 dzīduotuojis nu tyvejuos apleicīnis. Kai smejās pošys sīvys – ka nabyutu dzīduojušys, ni dzīsmis zynuotu, ni pasauļs apsavārtu, tik sātā sādātu – a tū paspēt var vysod.

Škilbanu etnografiskais ansamblis ir pīsadaliejs vysūs Latvejā bejušajūs folklorys festivalūs „Baltica” i ari itymā godā kūpā ar Upeitis etnografiskū ansambli ness Škilbanu pogosta vuordu festivalā.

Koncerts īsasuoce ar ansambļa himnu – Rozālijis Slišānis teiktū dzīsmi „Es apsieju lynu dryvu”, ar kurū pyrma daudzim godim ari aizasuokuse ansambļa darbeiba. Koncerta laikā tyka izdzīduotys 11 ansambļa repertuara dzīsmis – kotra ar eipašu veļtejumu kaidam etnografiskajam ansamblim itūs darbeibys godu laikā nūzeimeigam cylvākam, atbaļsteituojam.

Ansambli sveikt beja sabraukuši tyvuokī sābri – Upeitis etnografiskais ansamblis, Medņovys etnografiskais ansamblis kai ari Baļtinovys etnografiskais ansamblis. Dzīduotuojis sajieme ari atzineibys rokstus par tradicionaluos kulturys saglobuošonu nu Kulturizgleiteibys i namaterialuo montuojuma centra.

Sveicieji vielieja ansamblim vēļ ilgu dzīduošonys myužu i skaneigys dzīsmis!

Karteņuos – Škilbanu etnografiskuo ansambļa 30 godu jubileja koncerts, foto LaKuGa

.