Itaidys aktivitatis izraiseja lelu skateituoju interesi i rezonansi. Kai stuosteja kursu dalineica Ilze: „Itys izvadums beja kai punkts iz i treis nedeļu ilgim Latvejis intelektualuos atteisteibys fonda reikuotajim „Vyspuseiga intelekta atteisteibys” kursim”. Nu 2012. goda 30. apreļa da 22. majam Daugovpiļs nūvoda gostu sātā „Kurciems” nūtyka intensivys apvuiceibys kursi, kurymūs pīsadaleja 40 nu 18 da 62 godu vaci dalinīki nu Latgolys i Vidzemis regionim. Itūs kursu golvonuo ideja ir baļsteita iz kotra dalinīka intelektualuo potenciala atvieršonu, izpratnis snīgšonu biologejis nūzarēs i socialuos atbiļdeibys tematim. Kursi tyka reikuoti treis volūduos: latvīšu, krīvu i angļu. Kai stuosta kursu autors Viesturs Dūle, kursus reikuot Latgolā tyka izlamts, jo ite ir daudzpuseiguoki, atvārtuoki i na cik aizsprīdumaini ļauds. Treis nedeļu vuiceibu procesa i 25 pasnīdzieju komandys aizdavums ir īvuiceit izprast neirozynuotnis, endokrinologejis, fizikys, kīmejis, biologejis pamatprincypus.

Radzūt smaidūšuos sejis, mirdzūšuos acs i prīšknasumu Daugovpilī skaidri apsazynuoju, ka kursu intelektualuo potenciala atvieršonys metodologeja dorbojās. Īprīcynoj fakts, ka itaidi kursi tiks reikuoti atkuortuoti i katram Latvejis īdzeivuotuojam tiks pīduovuota īspieja atvērt sovu potencialu, sajust energejis pīplyudumu, spieju dūmuot dreižuok, pozitivuok i apsazynuot sevi kai sociali atbiļdeigu personu.

Sagatavieja Zane Bramane, Daugovpiļs Universitatis studente