LgSC goldā niu ari audiogruomota „Vectētiņš Antontiņš un mēs” i KONKURSS

LgSC goldā niu ari audiogruomota „Vectētiņš Antontiņš un mēs” i KONKURSS
Sasadorbojūt ar latvīšu tekstilmuokslineicu Ivetu Vecenāni, niu LgSC gruomotu goldā ir īspieja nūpierkt ari audiogruomotu par dzedu Ontonteņu i juo pīdzeivuojumim. Autore niu poša diskā skaita sovu bārnu gruomotu „Vectētiņš Antontiņš un mēs”, kū 2009. godā izdeve izdevnīceiba „Liels un mazs”.

Kai gruomota, tai disks ir latvīšu literarajā volūdā, tok jei stuosta par cīši namīreigu i spraunu dzedu Latgolā, kas dzeivoj azara krostā, tur vysaidus kustūņus i vysu laiku nazkū dora, struodoj i ari gols golā sastruodoj.

Par gruomotys golvonū varūni poša autore ir sacejuse, ka dzeivei kruosu dalīk naparosti cylvāki — dzeivis muokslinīki. Taids ir i dzeds Ontonteņš: „Nivīna juo dzeivis šaļteņa nav garlaiceiga ni pošam, ni mums — i vysu vaira babai, partū ka dzedam vysys dīnys ir pylnys nūtykumu.”

Dzeda gudreiba, dobys i tradiceju izjiuta eistā myusu dīnu Latgolys sātā īt vīnā ailē ar jūkim i nadīnom, kas myužam sasaceļ ap namīreigū dzedu Ontonteņu. Autore dzeivi dzeraunē naidealizej, deļtuo nūskaņa ir pozitiva i kruosaina.

Dzeivē na kotram bārnam ir dzeraunis sāta skaista Latgolys azara krostā, kur kūpā ar dzedu i babu dzeivoj gūvs, zyrgs, kači i vystys, kur ar laivu var braukt giut zivs, a rotūs piec meža zemneicu. Mozajim piļsietnīkim itī stuosti reizē byus kai dzeraunis dzeivis enciklopedeja, kas padareis leluoku juo redzīni i atkluos, kaids pīnam sakars ar gūvi, dorbam ar mīlesteibu i kasdīnai ar svātkim. Daudzī mozī nūtykumi sasaauž lelā rokstā, i atsakluoj myusu dīnu dzeivis sakareibys ar dobu i senejū pasauļa redzīni, kur sūpluok pruotam volda i dvēsele.

Audiogruomotu „Vectētiņš Antontiņš un mēs” meklej LgSC gruomotu goldā jau itū sastdiņ i svātdiņ Breivdobys muzeja godatiergā, piečuok i cytūs tiergūs Latgolā i cytur Latvejā, trešdīņu vokorūs nu 17 da 20 stuņdem — LgSC birojā Antonejis īlā 8-3/6.

KONKURSS!

Tim, kas grib paraudzeit sovu veiksmi, LaKuGa pīduovoj īspieju īgiut sovā eipašumā itū audiogruomotu. Vīneigais aizdavums – pareizi atbiļdēt iz vaicuojumu i pareizū atbiļdi da 7. juņam atsyuteit Latgalīšu kulturys gazetai iz info@lakuga.lv ar nūruodi viestulis tematā – Ontonteņš. Vīnam laimeiguokajam pareizuos atbiļdis pīsyuteituojam – bolvā audiogruomota  „Vectētiņš Antontiņš un mēs”.

Vaicuojums: Kurys ar Latgolu cīši saisteitys muzykalys apvīneibys muzykys diskam tekstilmuokslineica Iveta Vecenāne sovulaik ir taisejuse grafiskū dizainu?

A Folklorys kūpai “Svātra”
B Etnoroka grupai “Laimas muzykanti”
C Etnodžeza grupai “Patina”
D  Vokali instrumentalai apvīneibai “Alverna”

Print Friendly, PDF & Email

Kalenders

Jul
21
Svā
16:00 Koncertizvadums “Atgriežamies La... @ Dzintaru koncertzāle
Koncertizvadums “Atgriežamies La... @ Dzintaru koncertzāle
Jul 21 @ 16:00 – 18:00
Latgolys cylvāku spāks i humora dzierksts, kai ari vaira nakai 100 nūspālātys “Latgola.lv” izruodis īdrūsynuojušys autorus taiseit koncertizvadumu “Atgriežamies Latgolā”. Itamā kompanejā ir apsavīnuojuši režisors Valdis Lūriņš, komponists Valdis Zilveris, dzīšmu tekstu autors Jānis Peters,[...]
Jul
26
Pīk
09:00 Annys Dagdā @ Dagda
Annys Dagdā @ Dagda
Jul 26 @ 09:00 – Jul 27 @ 23:45
Annys Dagdā @ Dagda