Izdoncuots II storptautyskais dzigu festivals „Eima, eima”

Izdoncuots II storptautyskais dzigu festivals „Eima, eima”
II storptautyskais dzigu festivals „Eima, eima” gūdam nūsvieteits. 30. junī festivals īsasuoce ar Lobdareibys koncertu Bolvu pansionatā i sasadoncuošonu Bierzkalnis pogosta estradē. Vokorā lelkoncertā „Doncuosim!”  Bolvu piļsātys parka estradē pīsadaleja Bolvu, Baļtinovys, Ruguoju, Vileks, Olyuksna i Ludzys nūvodu dzigu kolektivi. Lelkoncertā kolektivi izdoncuoja raksturdzigys nu vosorys saulgrīžim da rudiņa saulgrīžu laikam. Vieramīs saulis dzigys vosorys saulgrīžu laikā, izdareibys darbeigūs saiminīku dienā Jākubūs i čakluos saimineicys Annys dīnā, ryupejamīs, kab labeiga aug teirumā, protom vysu izaudzātū nūvuokt i nūtierguot.

Storptautyskuo dzigu festivala idejis autors ir festivala muokslenīcyskais vadeituojs i Bolvu regiona dzigu kolektivu viersvadeituojs Agris Veismanis. Pyrma treis godu festivals pyrmū reizi nūtyka Bolvūs. Itūgod A. Veismanis nūlēme, ka ir daguojs laiks pulcynuot kūpā Baltejis valstu doncuotuojus, kab sev i skateituojim par prīcu izadoncuotu i nūsavārtu kaidus dzigu sūļus doncoj sābrūs. Lelkoncertā „Doncuosim!” Igauneju puorstuovieja Pilvys piļsātys jaunīšu dzigu kūpa „Kagu Kabujalakōsō”, Krīveju – Opskys piļsātys saimis dzigu kūpa „Zavalinka” i Lītovu – Zarasai kulturys centra dzigu ansamblis „Ežerūnas”. Sābru vaļstu kolektivi boguotynuoja svātkus ar naradzātom dzigom, horeografejom, muzykalū pavadejumu i tārpim. Koloritū Krīvejis kolektiva izastuošonu, skaiškūs tārpus i solistis Irinys Konopļovys skaneiguos dzīsmis vēļ ilgi pīminēs pasuokuma apmaklātuoji.

Lela prīca, ka na tik bolvenīšim beja īspieja viertīs sābru vaļstu kolektivu izastuošonu, nu ari Vileks nūvoda cylvākim, jo svātdiņ, 1. julī, Vileks piļsātys estradē koncertā „Igauneja, Latveja, Līvota… myus vīnoj dziga!” pīsadaleja Pilvys piļsātys jaunīšu kūpa „Kagu Kabujalakōsō” i Zarasai kulturys centra dzigu ansamblis „Ežerūnas”. Latvejis doncuot prasmi ruodeja „Dēka”, „Dēkaiņi”, Škilbanu pogosta jaunīšu tautu dzigu kolektivi i Bolvu Kulturys i atpyutys centra senioru dzigu kūpa „Luste”. Latvīšu tautu dzigu sūli pateikami papyldynuoja naradzātī lītovīšu tautystārpi i izastuošona, i naparastuos igauņu jaunīšu dzigys. Lītovīši ar eleganci i izneseigim tārpim paruodeja Klaipedys regiona dzigys, kas leidzynuojuos smolkom Anglejis golma dzigom. Kai ari lītovīšu videjuos paaudzis dzigu kolektivs paruodeja kaidus valšus i polkys doncoj Lītovā. Igauņu jaunīšu dzigu kolektiva atraktivuos dzigys, azartiskuo doncuot prīca, straujuos dzigu horeografejis aizruove kotru skateituoju. Igauņu kolektivs Zīmeļlatgolā gasteja ūtrū reizi. Puse kolektiva dalinīku ir pīsadalejuši ari pyrmajā storptautyskajā dzigu kolektivā „Eima, eima”. Kūpys „Kagu Kabujalakōsō” treners ir labi pazeistams Igaunejis horeografs i dzigu školuotuojs Maido Saar. Igauņu dzigu kūpā ir profesionali doncuotuoji, kuri koncertej Igaunejā i uorzemēs, kai ari pīsadola breivdobys izruožu īstudiešonā.

Nu Bierzpiļs pusē dzeivojūšim 1. julī koncertā beja īspieja sasatikt ar Opskys piļsātys saimis dzigu kolektivu „Zavalinka”. Krīvejis kolektivs izastuošonys laikā pasamaneja treis reizis puormeit tārpus, dūdūt īspieju skateituojim nūvērtēt krīvu tauteibys temperamentu i jim tik rakstureigūs dzigu sūļus.

Lītovīšu kolektiva vadeituoja Jovita Mikutaviciene atzineigi nūviertieja sakuortuotū kulturys infrastrukturu Bolvūs i Viļakā. J. Mikutaviciene saceja: „Jiusim ir sakuortuotys estradis i kulturys nomi. Myusim beja lela, lela prīca doncuot skaistajūs dzigu svātkūs Latvejā. Lelu paļdis par izjimšonu sokom Bolvu i Vileks nūvodu pošvaļdeibom. Caram ari iz prīšku sasadorbuot ar jiusu pašvaļdeibom. Aicynojam jiusu dzigu kolektivus pīsadaleit dzigu svātkūs Zarasai piļsātā i rajonā!”. Bolvu nūvoda dūmis prīšksādātuojs Andris Kazinovskis pasnīdze Pateiceibys rokstus vysim kolektivu vadeituojim, kuru vadeitī kolektivi pīsadaleja starptautyskajā dzigu festivalā. Jis pasateice vysim par īguļdeitū dorbu i beja prīceigs, ka skateituoju rynduos varieja redzēt vysu paaudžu cylvākus: bārnus, pīaugušūs i seniorus. A. Kazinovskis atzyna, ka dziga vīnoj vysys paaudzis i aicynuoja sasatikt jau cyta goda festivalā!”

Sagatavieja Vineta Zeltkalne

Karteņuos – II storptautyskais dzigu festivals „Eima, eima”, autoris foto

Print Friendly, PDF & Email

Kalenders

May
18
Sai
10:00 Muzeju nakts @ Maltys viesturis muzejs
Muzeju nakts @ Maltys viesturis muzejs
May 18 @ 10:00 – 21:00
Muzeju nakts “Izzinot latgaliskās rotas, tērpus un stāstus”10.00 Pietnīcysks (izzynojūšs) ceļuojums pa Maltys apleicīnis piļskolnim ar viesturis aktivistu i konstruktoru bīdreibu “Kroma kolna bruoliste”.16.00-18.00 Darbneica “Seno latgaļu rotu rakstu noslēpumi” (7.-13. g. s.), kurū vadeis[...]
15:00 Muzeju nakts @ Naujinis Nūvodpietnīceibys muzejs
Muzeju nakts @ Naujinis Nūvodpietnīceibys muzejs
May 18 @ 15:00 – 23:45
15.00 – 24.00 Apmaklātuojim daīmamys jaunuos izstuodis: viesturis izstuode “Juzefovas stacija: ceļojums laikā”, izstuode nu muzeja kruojuma “Valentīnas Zeiles dažādās sejas: dzejniece”, izstuode “Livonijas ordeņa Dinaburgas pils senlietas muzeja krājumā”, breivdobys izstuode muzeja teritorejā “Novadnieku[...]
15:30 Muzeju nakts @ Bolvi
Muzeju nakts @ Bolvi
May 18 @ 15:30 – 23:45
Muzeju nakts @ Bolvi