3. Pasauļa latgalīšu konfereņce jau reitu

3. Pasauļa latgalīšu konfereņce jau reitu

Reitu, 9. augustā Rēzeknē ar Latgolys karūga svineigi paceļšonu pi Rēzeknis nūvoda dūmis suoksīs 3. Pasauļa latgalīšu saīta konfereņcis daļa ar nūsaukumu „Latvejis naatkareibys laiks – Latgolys īspieja voi izniceiba”.

Konfereņcē ar referatim pīsadaleis zynuotnīki, pošvaļdeibu i vaļsts organizaceju darbinīki, navaļstiskūs organizaceju, plašsazinis leidzekļu puorstuovi, školuotuoji i uzjiemieji.

Konfereņce īsasuoks ar plenarsēdi, kurā kai runuotuoji izastuos Henrihs Soms nu Daugovpiļs Universitatis ar temu „Modernuos tehnologejis — jaunys īspiejis Latgolys pietnīceibā: Pyrmuo Pasauļa latgalīšu saīta (1992) konfereņcis skaņu īroksti“, Latgolys regiona atteisteibys agenturys direktors Māris Bozovičs ar „Kompleksi rysynuojumi Latgolys regiona atteisteibai 2030“, Sanita Lazdeņa nu Rēzeknis Augstškolys ar „Voi latgalīšu volūdai ir tierga vierteiba? Naakademiskais (tautys bolss) i akademiskais (zynuotnīka vīdūklis) diskurss“ i Aleksejs Andronovs nu Sanktpīterburgys Universitatis i Lideja Leikuma nu Latvejis Universitatis viesteis par braucīnim maklātu Sibira latgalīšu.

Piečuok dorbs ar referatu prīškskaitejumim turpynuosīs diskusejā par tautsaimnīceibys i uzjiemiejdarbeibys atteisteibys nūsacejumim Latgolā i viesturis, literaturys i folkloristikys sekcejā. Konfereņcis ūtrā dīnā, 10. augustā, da pušdīņu nūtiks paralels dorbs volūdys i latgalīšu volūdys i literaturys metodikys sekcejuos, bet piečuok diskusejā „Plašsazinis leidzekli i jūs īspiejis latgaliskuma veicynuošonā“ uzastuos Latgolys regiona medeju darbinīki i interesenti. Pylnu konfereņcis programu verīs zamuok (leluoku var apsavērt izmīdzūt iz zaļuos saitis).

1992. goda 11.–13. augustā Rēzeknē nūtyka 1. pasauļa latgalīšu saīts, kas pulcynuoja vysaidu nūzaru specialistus, kab puorsprīst atmūdys laika nūtykumu strategeju i izmainis, kurūs vajag Latgolys regiona atdzimšonai. Tyka pījimti lāmumi par latgalīšu volūdys vaicuojumu aktualiziešonu, regiona plašsazinis leidzekļu i gruomotu izdūšonys atbolstu, Rēzeknis Augstškolys izveiduošonu. Pasuokuma laikā tyka atkluots atjaunuotais pīmineklis „Vienoti Latvijai“.

2002. goda 11.–13. augustā tyka organizāta 2. pasauļa latgalīšu konfereņce, kuramā pījēme uzsaukumu, kū nūsyuteja tuo laika Latvejis Republikys augstuokajom amatpersonom. Jimā tyka atzineigi nūvārtāta Vaļsts volūdys lykuma izstruode, RA nūdybynuošonys fakts, atbolsts Latgolys Kulturys centra izdevnīceibys dorbam, taipat tyka izvierzeiti bez kaviešonuos rysynojamī aizdavumi, nu ituo goda konfereņcis reikuotuoji ar nūžālu secynoj, ka desmit godu laikā vaļsts leiminī praktiski nikuo nav dareits, kab apturēt lauku izmieršonu i bezdorba pīaugumu.

Itymā godā – 3. konfereņcē tuos daleibnīki kūpeigā diskusejā raudzeis puorsprīst Latvejis naatkareibys laika Latgolys atteisteibys teņdeņcis i paneikuma īmesļus ekonomikā, izgleiteibys, volūdys, kulturys politikā i aktivi īsasaisteit vaļdeibys veiduotuos Latgolys atbolsta programys realizacejā.
3. Pasauļa latgalīšu konfereņcis programa

Print Friendly, PDF & Email