Juļa beiguos 25. jubileja koncertā Leivuona kapela „Jūlijs” svieteja ari kapelys jaunuokuo albuma „Gadi virtenē krājas” izīšonu.

Sovys pastuoviešonys laikā kapela izdevuse septenis audio kasetis, nu kurūs pyrmuo „Rudzu maize” izguojuse 1993. godā, i pīcus albumus kompaktdiska format.Jaunuokajā albumā „Gadi virtenē krājas” atrūnomys 22 dzīsmis kapelys vadeituoja Jūlija Stikuta aranžejumā – gon nu kapelys „Jūlijs” „zalta fonda”, gon taidys, kas nav dzierdātys nivīnā īrokstā. Nu 22 dzīsmem 5 dzīsmis īdzīduotys latgaliski – tūs vydā ari Pītera Jurceņa dzīsme „Jampadracis”, kuru pīduovojam nūsaklauseit ari LaKuGys skaiteituojim.

Albumā atrūnoma ari pārnuos sezonys Latvejis šlageraptaujā klauseituoju viereibu īmontuojusī dzīsme „Reiz vecās dzirnavās”, taipat veļtejums dzymtajam nūvodam dzīsmē „Atslēga Latgales vārtos”.

Kapela „Jūlijs” rodusīs pyrma 25 godu, kod kapelys dybynuotuojs i vadeituojs Jūlijs Stikuts kūpā ar sīvu Helenu suokuši muzeicēt dažaidūs gūdūs, vysu vaira tī bejuši kuozys. Kapelys repertuaram nu suoku beja pošu vuoktys dzīsis i ziņgis i pošu reizi taidu dzīšmu ir jau ap ostoni symti. Repertuarā gon naasūt tik latvīšu dzīsmis, nu ari pa kaidai dzīsmei pūļu i krīvu volūdā. Pošu šaļti kapelys sastuovā ir septeni muzykanti – Jūlijs i Helena Stikuti, skripku spielej Vineta Vaivode, ceitaru Gita Jākobsone, basgitaru Helmuts Jauja, trompetē iz meju pyuš Edmunds Jauja, Oskars Grīgs ci Imants Rusiņš, pi bungu Edgars Podskočiks i pa reizei ar vysim kūpā saspieļoj ai Jūlija i Helenys mozdāls Ivo Pētersons.

Albuma izdeviejs „Gailītis G”, atbalsteituoji Leivuona nūvoda dūme i Leivuona nūvoda Kulturys centrs.

Albums „Gadi virtenē krājas” nūpārkams „Gailītis G” izdavumu tierdznīceibys vītuos, kai ari „Latgolys Studentu centra” latgalīšu gruomotu i disku goldā.