„SĀTA” – latgaliska vīta Daugovpilī

„SĀTA” – latgaliska vīta Daugovpilī

Naz kai napaseņ škārsteikla vītuos pasaruodeja viests par jaunu kopejneicu – veikalu  Daugovpiļs centrā (Vīneibys īlā 17) ar meilu, syltu nūsaukumu – „SĀTA”. Tī asūt vyslobuok īt, kab sasatiktum ar sovejim, deļ tam, ka dzerūt zuoļu čaju i dakūžūt pa senejam taiseitūs peirāgus, saejūt vyssirsneiguokuos sarunys, tī tik teišom varūt sasajust kai sātā.

Kai soka pats kopejneicys nūsaukums, vyss interjers ir īturāts autentiskā latgalīšu sātys stylā, goldauti i ručinīki nu babu pyura skreinem, pat pučis iz lūga kai sātā – muškaturi i papardis. „„SĀTA” nasaroda najauši, golvonuo dūma beja, sataiseit pēc īspiejis autentiskuoku latgalisku vītu, kur daugovpilīšim i gostim pasēdēt, izdzert čajs krušku, nūpiekt kaidu amatnīka taseitu suveniru. Es navarieju ticēt, ka kai tai var byut, ka myus piļsātā ir kīnīšu, gruzīnu, itāļu restorani, bet nav ni vīnys vītys, kur byutu kas latgalisks,” stuosta kopejneicys vadeituoja.

„Suoku vaicuot vysu informaceju, par Latgolys viesturi, kulturu, amatnīceibu, ēst gataveišonu, analizēt kūpeigū i sovpateigū, vysu pamazeitem vuoču kūpā, tod saraksteju projektu caur Nūdarbynuoteibys vaļsts agenturu (NVA) i tai vysu salīkūt roduos „SĀTA”,” stuosta saimineica.

Nu kura laika jius jau struodojit? „Mes struodojam jau nu juļa, iz itū breidi jau sasadorbojam ar amatnīkim, pūdnīkim, kuru dorba rezultatus jius jau vari ite redzēt i nūpierkt, gordū čaju vadam nu čaju saimesteibys „Kurmīši”. Veļ paradzāts sasadorbuot ar cytim rūkdorbnīkim, kuru dorbus ari varēs nūpierkt ite,” stuosta „SĀTYS” saiminīks Igors.

Iz vaicojumu, kaids ir videjais kopejneicys gasteituojs, saiminīki soka, ka cīši dažaidi. Asūt uorzemnīki, asūt nu cytom piļsātom i Daugovpils vītejī dzeivuotuoji. „Augustā pi myusu beja turisti nu Pīterburgys, beja cīši interesnai, deļ tam, ka jī nasabeida paraudzeit vysaidu sortu čajus, peirāgus, kaidus nikod nav āduš. A eiropīši ir nadrūsi, zuoļu čajus nadzer iz peirāgim ar kuopustim, buļvim voi burkuonim verās cīši aizdūmeigi, jim vaira interesej amatnīceibys lītys” atguodoj kopejneicys vadeituoja.

„Pi myusu golvonais nav kvantitate, a kvalitate, itei nav vīta, kur mudri īskrīt i paēst pušdīnys par lātu naudu, voi izdzert krušku ols. „SĀTA” ir vīta ar nūskaņu, vīta, kurymā gribīs satikt sovus meilūs cylvākus, lānai baudūt čaju i peirāgus, runuot par sev svareigom lītom. Dažim cylvākim kopejneica raisa nostaļgiskis sajiutis par sovu kuodraiz bejušū sātu Latgolā, kur iz golda beja taišni taidys sedzenis i baba adeja taišni taidys musturainis zečis… Pi myusu daudzi cylvāki veļ nav da tuo izauguši, lai nūvārtātu rūku dorbu, bet dūmoju, ka iz prīšku situaceja byus lobuoka” sovuos puordūmuos doluos saimineica.

„Vysus „SĀTYS” peirāgus taisu poša nu dabeigim poduktim, īvārojūt senejuos receptis, kurys ir izadevs dabuot nu gūdu saimineicom. Burkuonu peirāga recepti dabovu nu Ondrupinis, ļaudim cīši īt pi sirds. Veļ ari taisu sklandraušus, kas nav eisti latgalīšu tradicionalais iedīns, bet ir cylvāki, kas gryb paraudzeit ari kaidu kūrzemnīku iedīni i par kū ta nā, Latveja tai jau moza i izdaleit veļ pa nūvodim byutum grāks”.
„Iz prīšku raudzeisim īkuortuot kopejneicu veļ pateikamuoku, sasadorbuosim ar rūkdorbnīkim, izliksim uorā pi īeejis lelu izkuortni „SĀTA”, tai lai vysi redz i var īt pi mysu gasteit. Vysus interesentus gaidom jau pi myusu tagad, var taiseit kaidus pasuokumus, dzejis skaitejumus, svinēt kaidus svātkus, peirāgus capu ari iz pasyutejuma” stuosta kopejneicys vadeituoja.

Gaideisim jiusus pi myusim „SĀTĀ”! Gasteišonys laiks: kotru dīnu nu 10.00 da 19.00.

Vaira dazynuošonys: Vieneibys īla 17, Daugovpils, Tel.: +371 28808097, e-posts: igors25@inbox.lv

Iz „SĀTU” gasteit guoja Dagneja

Print Friendly, PDF & Email

Komentari