11. oktobra vokorā Daugovpiļs Park Hotel Latgola kliva par latgaliski muzykalū solu – tī, taipat kai pyrma četru godu, sovu jaunū muzykys albumu prezentieja grupa “Dabasu Durovys”. 

Vokora suokuos grupys “Dabasu Durovys” līders Arņs Slobožaņins atguojušūs īpazeistynuoja ar jaunū albumu, nu vokora turpynuojumā muzykali prīcieja lobuokī Daugovpiļs muziki i grupys “Dabasu Durovys” draugi. Iz skotuvis kuope Laura Bicāne, Evija Smagare, Nick Dawes, kai ari Guntis Rasims. Taipat vysus prīcieja ari poši pasuokuma vainenīki “Dabasu Durovys”.

Jaunajā grupys albumā “Styklu vītā skaņa” īkļautys 14 kompozicejis latgalīšu, latvīšu i angļu volūduos. Albums īraksteits Arņa Slobožaņina sātys studejā. Miksieja Armands Treilihs, Edgars Skrāģis, Nick Dawes. “Styklu vītā skaņa” pīskandynuošonā pīsadalejuši vasali 17 muziki. Albuma apstruodi padariejs Nicolas Dawes (Franceja). Albumu „Styklu vītā skaņa” izdūd „Latgolys Producentu Grupa”. Albuma informativī atbaļsteituoji ir Latgolys Radeja, Divu krostu radeja i portals Lakuga.lv.

Pīduovojam pasuokumā īsavērt ar karteņu paleidzeibu. Foto – LaKuGa.