Latgolys viestnīceiba „Gors” pīsadola Latvejis kulturys viestnīku apvuiceibu programā

Latgolys viestnīceiba „Gors” pīsadola Latvejis kulturys viestnīku apvuiceibu programā

Latgolys viestnīceibys „Gors” vadeituoja (SIA „Austrumlatvijas koncertzāle” volda lūcekle) Diāna Zirneņa ir īsasaistejuse Kulturizgleiteibys i namaterialuo montuojuma centra, Britu padūmis Latvejā i bīdreibys „CultureLab” reikuotajā apvuiceibu  programā „Latvejis kulturys viestnīki”.

„Latvejis kulturys viestnīku apvuiceibu programa ir breineigs veids, kai papyldynuot sovys zynuošonys i izmontuot tuos praksē. Nu suoku varātu ruodeitīs, ka programys nūsaukums ir cīši ambiciozs. Vys tik tuos patīsuo byuteiba ir viesteit, zynuošonys padūt tuoļuok kulturys laukā struodojūšajim, kab uzlobuotu jūs profesionalū kompetenci i sekmātu jaunradi. Ir patīsa prīca i gandarejums apvuiceibā dabuotuos gudreibys puorvest sātā Latgolā”, soka Latgolys viestnīceibys „Gors” vadeituoja Diāna Zirneņa, dasokūt, ka apvuiceibu programa ir ļuovuse īpazeit radūšus i profesionalus ļauds ari nu cytim Latvejis nūvodim.

Izgleiteibys programys „Latvejis kulturys viestnīki” mierkis ir sagataveit 20 apvuiceituojus, kas dažaiduos Latvejis kūpīnuos paleidzes sagatavēt Latvejis kulturys viestnīkus, kas sovom kūpīnom paleidzēs apsazynuot vītejū i nacionalū kulturu kai izaugsmis resursu, stiprynuos latvyskuos kulturys apziņu, taiseis izpratni par atvārtu kulturys identitati i mobilizes pozitivom puormaiņom salīdātys sabīdreibys taiseišonā.

Apvuiceibu dalinīki dabuos zynuošonys i informaceju par dažaidim skatejumi iz kulturu i identitati, sovys vaļsts i kūpīnys kulturys daudzveideibu i dažaideibys kai vierteibys apsazynuošonu, kai ari atteisteis prasmis sovys kūpīnys kulturys dzeivis ilgtermeņa planavuošonā i vadeišonā plašuoku atteisteibys procesu kontekstā. Dalinīki dabuos īdvasmu tuoļuokam dorbam i vareibu sasatikt ar leidzeigi dūmojūšim, kab sataiseitu ilgtermeņa partnereibys. Programys golā dalinīki sajems aplīceibu.

Latvejis kulturys viestnīku aizdavums byus piec apvuiceibu programys gola eistynuot vysmoz vīnu kulturys viestnīku apvuiceibys programu sovā kūpīnā, raugūt aptvert piec īspiejis dažaidys mierka grupys (tauteibys, vacuma grupys, profesejis i tml.). Taipat kulturys viestnīkim kūpā ar apvuiceibys dalinīkim byus juoatteista Latvejis kulturys viestnīku sadarbeibys teikls i juorūsynoj kūpeigu iniciativu i projektu taiseišona.

Izgleiteibys programa „Latvejis kulturys viestnīki” sastuov nu treis nūdarbeibu cyklim, nu kurim pyrmais nūtyka 2012. goda 24. i 25. novembrī. Nūdarbeibys turpynuosīs itymā nedelis golā 15. i 16. decembrī, kai ari 2013. goda 19. i 20. janvarī. Izgleiteibys programu „Latvejis kulturys viestnīki” pīduovoj Kulturizgleiteibys i namaterialuo montuojuma centrs, Britu padūme Latvejā i bīdreiba „CultureLab”, sasadorbojūt ar Kulturys ministreju. Apvuiceibu programa bolstuos iz divejim Britu padūmis Latvejā projektim – „Vydskulturu viestnīki” (Intercultural Navigators) i „Darbeiguos kūpīnys” (Active Citizens).

Informaceju sagatavieja Aija Ereņa, SIA „Austrumlatvijas koncertzāle” marketinga nūdalis vadeituoja

Karteņuos – Latvejis kulturys viestnīku apvuiceiba, publicitatis foto


Print Friendly, PDF & Email