Latvejā pyrmais audio spieļu disks izīt ari latgaliski /KONKURSS
Novembra beiguos izguojs Latvejā pyrmais audio spieļu disks, kas dabojams latvyski, krīviski i ari latgaliski.
Diska idejis autore ir Aiga Jakuškina – Ādama, kurys saknis ir Rēzeknis nūvoda Rykovā. „Voi ari jiusim, braucūt tiuļuokā ci tuoļuokā ceļojumā ar saimi, braucīna laikā ar mašini ir saguojs garlaikuotīs? Nu varbyut, asūt sātā, pruotu nūdarbynuojušys dūmys, kū dareit, kab bārnim byutu interesna ar jiusim pavadiet laiku? Mani ir,” tai soka Aiga i deļ tuo ar saimis i lobu cylvāku paleidzeibu realiziejuse sovu ideju i izdavuse disku „Audio SPIELIS breineigom strēčom”, kurymā īkļautys 18 atjauteibs, fantazēju atteistūšys i izgleitojūšys spielis bārnim i pīaugušajim. Taipat diskā īkļautys dažaidys sarunu raisūšys temys. Vaicuota, deļ kuo disks ir ari latgaliski, Aiga atsoka, ka tei ir kai pateiceiba Latgolai i reizē ari nostalgeja piec dzymtuos pusis.
Atjauteibys spiele „Kas es taids asu?”, fantazejis spiele „Minhauzena stuosts”, vuiceibu spiele „Zvāri i zviereni” i daudzys cytys spielis byus breineigs veids, kai satyvynuot saimi i draugus, kai ari izzynuot kū jaunu.
Diskā īkļautuos spielis īrunuojs akters Kristaps Rasims, spielis īraksteitys studejā „REIGA”, skona efekti i piecapstruode – Uģis Vilcāns i Kristaps Rasims, CD vizualuo dorba autors „Skybird productions”.
Spieļu disks varātu byut ari breineiga Zīmyssvātku duovona. Tys nūpārkams gruomotneicuos, leluokajūs veikalūs, “Statoil” degvīlys izpiļdis stacejuos, Zīmyssvātku veikalūs tierdznīceibys centrūs „Spice” i „Galleria Riga” Reigā, kai ari Latgolys Studentu centra gruomotu goldā.
Vaira par spieļu disku skaiti: http://www.gamesavg.com/audio-spielis.html
Sadarbeibā ar diska „Audio SPIELIS breineigom strēčom” izdeviejim pīduovojam KONKURSU, kurymā treis veiksmeiguokī i ospruoteiguokī skaiteituoji varēs dabuot jaunū disku kai duovonu.
Konkursa aizdavums – leluokais trejūs teikumūs pīroksti, kam i deļ kuo tu grybātu izduovynuot itū spieļu disku? Sovu atbiļdi da 17. decembram syuti LaKuGai iz epostu info@lakuga.lv ar nūruodi SPIELIS. Konkursa rezultati tiks paziņuoti LaKuGā 18. decembrī.
