Jaunīšu postfolklorys grupa „Rikši” 19. janvarī Reigā folkklubā „Ala Pagrabs” svieteis sovu ūtrū jubileju.

Grupys jaunīši kūpā jau rikšoj divejus godus i sovu jubileju jī ir nūlāmuši svieteit ar kuorteigom ļustem. Svineibu vītys izvēle nav najauša, jo pyrma divejim godim 14. janvarī (kas ir eistuo jubileja dīna) taišni folkklubā „Ala Pagrabs” jaunīšim roduos vareiba suokt pīpiļdeit īdūmuotū ideju par „Vīteru” veteranu apsavīnuošonu kūpeigā grupiejumā, kab turpynuotu popularizēt folkloru i pavadeit laiku kūpā. Pi tuo, kai līcynoj grupys dalinīka Ērika apriekini, folkklubs ir tei vīta, kur „Rikši” ir koncertiejuši vysu vaira – jubileja koncerts byus jau 15. uzastuošonys reize „Ala Pagrabs” .

Grupys dalinīki aicynoj iz koncertu, kurā klauseituojus prīcēs ar vacajom lobajom dzīsmem, gon ari paruodeis kaidu jaunu gobolu, pasakavēs atmiņuos par grupys sataiseišonu i pīdzeivuojumim. Prūtams, naiztikt bez doncuošonys i vysim zynomom dzīsmem. I kur tod bez oluteņa, krūga povuoru gordajim breinumim i vīnkuorši ļusteigys, latgaliskys večerinkys atmosferys.

Pārn grupa tyka pi kūmom – dūdu i bungu grupys „Auļi”, tod itūreiz grupa ir nālāmuse paplašynuot sovu saimis pulku i sasabruoļuot ar postfolklorys grupu „Miglas asni”, ar kurim kūpeigi pavadeiti gon vairuoki koncerti, gon daleita mieginuojumu ustoba kai ari divi dalinīki. Klauseituojim byus īspieja dzierdēt ari „Miglas asnus”, kai ari pīsadaleit bruolānu/muosineicu tikšonys ritualā.