Zīmai iz atvodom/Inetys Atpilis-Juganis dzejūli

Zīmai iz atvodom/Inetys Atpilis-Juganis dzejūli

Puordūdu gabaleņu  augstys kvalitatis mozlītuotys zīmys.
Ar birku i cenu zeimi. I atsolušu vieju. Bonusā. Maņ navajag vairs.
Made in Latgola. Ka tam ir kaida nūzeime.
Izplyustūšom konturom, zedini nasatur, tik aicynoj caurleist.
Ladainys i cukravuotys mežginis lūgā.
Nazkas nu ūtrys pusis atsylda rūti
i daleimej reitu.
Dreiži smaržuos piec mandarinim.
Es tik drusku vēl gribiešu palītuot, tik drusku.
Viejs īgaumej mani  i puorsaceļ iz munys palūdzis.
Vyss otkon sasaškelvinej.

 

***

Tod, kod byus izītys
vysys durovys –
daklauvej.

 

***

Tovi skotlūgi vēļ naapraksteiti
i napīradynuoti.
Tovys viersūtnis vēl nabejušys, nu īspiejamys.
Pret vysu nanūsadrūšynuot.
Garantejis talonu i pamuoceibu, kai byut, lai byutu, nav.
Īprogrammeita īdzymtuo gribiešona nasastingt.
Sasamīrej.
Taipat izstreipuos tevi nu putnu maršruta i
leita garšys nabyus iz tovom lyupom.
Reizem pa trešdinem snīg.

 

***

Naktī pyrms solnys dabasi kai vuoks,
draudūši i spolgi klusi.
Cīši sals.
Napīradynuota suope kryvasūs maļdeisīs.
Sorkonkryuteiši byus tuoli, sveši i naliduos.
Īvys šūpavasar nūzīdēja puoruok kruošni i dreiži.
I saryugtēja.

 

***

Tik sapynā ceļš da Reigys naz kai spreidi tiuļuoks.
Bez krusys i akmiņu. I zababonu.
I piļsātys nūsastuoj lepnuok i nūsaver myus kai gaideitu i jaunu kinu.
I namiņ nivīns tev iz astis i naglauž pret spolvu.
Nivīns tevi nasaburza i naizmat, ka ar tevi nav cik vīgli, kai elpuot.
Tu aizsit elpu.
Nabrodoj pa svešim sapynim.
Pat cārmyuškys kūku zori plyki i napasorguoti.
Gondreiž vyss reproducej legendys.
Laiks sastyngst. Nazkas nazkur salyust.
I pa atslāgys caurumu snīg.

 

***

Rudiņa zibatmiņā naīsaraksteja lidojūšys bezdeleigys,
steidzeigi pyrmūdinis vokori i dzīsmis bez vuordim.
Tymsa daudzskaitlī, tylti i dūmuzeimis.
Reitdīna natiks reizynuota i pīleidzynuota kam cytam.
Vīnaldzeigi bolts.
Žylbynoj. Dzili aiz.
Vaicuojumi sev. I jaunys trepis.
Tuoļuok par sevi i patīseibu jau nikur naaizbēgt.
Jei jau pīpiļdeita ar mikriesli i mulsumu.
Iudiņs i kruosys.
Pavasars zīmā.
Īsaregistreju koč kur pa vydu.

 

***

Filigrani zeimej elpa.
Īdūrsteidama.
Aizkruosoj, aizbalynoj.
Esi.
Tepat tuoli blokus.
Puorzīmuosim.

 

Karteņa: I. Atpilis-Juganis personiskais arhivs

Print Friendly, PDF & Email

Komentari

Nūtikšonu kalendars