Reizi mienesī žurnalā „Ir” teik publicāta latgalīšu sleja, kas viestej par aktualim nūtykumim i vaicuojumim. Apreļa sleju “Vuolyudzānu laiks” ir pīrakstejuse Kuorsovys vydsškolys latvīšu volūdys i literaturys školuotuoja Līga Rundāne.

Regulara latgalīšu sleja vīnā nu vodūšajim Latvejis medejim ir seņ dūmuots, tok reizē nagaideits pīduovuojums. Juos autori ir dažaidi Latgolys ļauds — kotru reizi cyts autors, cyta aktualitate, cyts stuosts.

Slejis autori teik aicynuoti eisā rokstā izsaceit sovu redziejumu par latgaliskū pasauli i latgaliskuo vītu pasaulī, pastuosteit par sovu pīredzi voi izsaceit sovu redziejumu par aktualim vaicuojumim i nūtykumim.

Apreļa slejā Līga Rundāne stuosta latgalīšu skotuvis konkursu „Vuolyudzāni” i olimpiadi vydsškolānim, kas ituo goda 27. aprelī nūtiks Rēzeknē.

Sevkurs puornūvodnīks varātu vaicuot, parkū itys konkurss ir vajadzeigs i parkū jis tik populars. Pavysam vīnkuorši — konkursā vysi runoj latgaliski. Latgolys školu bārni pīsadola ari vaļsts mārūga konkursā, bet daudzus attur tys, ka mes na vysod muokam izrunuot vysys latvīšu literaruos volūdys intonacejis. Tys ir dabiski — latgalīšu volūdā nav stīptuos intonacejis. Vēļ juopīmiņ i tys, ka “Vuolyudzānu” atmosfera vysod ir breiva i draudzeiga. Var ar vysu byutīni sajust, ka ite vysi ir sovejī. Partū konkursā pīsadola ari tī školāni, kurī kasdīnā kaunejās runuot latgaliski — te jī runoj breivi i nu sirds.

Līgys Rundānis rokstu skaiti ituos nedelis (04.04.-10.04.2013.) žurnalā “Ir” voi ari škārsteiklā ite: ir.lv/2013/4/3/vuolyudzanu-laiks.

Informaceju sagatavuoja Ilze Sperga,
žurnala „Ir” latgalīšu slejis koordinatore