Par gūdu Latvejis Republikys Naatkareibys atjaunuošonys godadīnai 4. majā Rēzeknē tiks pīduovuota plaša svātku programma, kas pīseitynuota ar muokslys i rodūšuma gaisūtni. Nūtiks dažaidi pasuokumi muzejā, kulturys nomūs, pi pīminekļa „Vienoti Latvijai”, Kulturys i atpyutys parkā.

Nu 10:00 leidz 12:00 pi pīminekļa „Vienoti Latvijai” spēlēs pyutieju orkestris, nūtiks svineiguo puču nūlikšona.

Nu 10:00 leidz 16:00 Latgolys Kulturviesturis muzejā īeja bez moksys. Apmaklātuojim byus apsaverama LMA LF studentu mozūs tielnīceibys formu i medaļu izstuode „Brīvība”, izstuode „Pasmel mākslu!” (SPAINIS) – muokslinīku apgleznuoti, puorveiduoti spani, I. Greizānis, V. Stupānis, A. Ritinis, V.Ušpelis gleznu izstuode „Kvatro”, kai ari muzeja pastuoveiguos izstuodis „Rēzekne laikmeta griežos” i „Māla un uguns pārvērtību radīts brīnums”.

Nu 12:00 leidz 17:00 Rēzeknis piļsātys Kulturys i atpyutys parkā dīnys pasuokumi, īeja bez moksys. Parka teritorejā dorbuosīs pīpyušamuos atrakcejis, karuseli, kopejneica i bufete. Atnuokušajim byus īspieja pīsadaleit dažaiduos rodūšajuos darbneicuos – karūdzeņu, muzykys, teatra i cytuos darbneicuos. Aktivūs dalinīkus sagaida bolvys i duovonys.

Turpat parkā muokslys dīnu laikā nūtiks storptautiskuo muosklinīku plenera „Domas lidojums” dorbu izstuode. Prof. O. Zvejsalnīks, Vl. Paurs i c. plenera muokslinīki vadeis gleznuošonys meistarklasis. Pīsadaleit varēs sevkurs naatkareigi nu tuo, ir ci nav zynuošonys i prasmis muokslā. Materialus nūdrūsynuos organizatori. Vītu skaits gon ir īrūbežuots.

Nu 20:00 leidz 22:30 Kulturys i atpyutys parkā Latvejis Eirovizejis finalistu bītboksa grupys „PeR” i postfolklorys grupys „Rikši” koncerts, īeja 2.00 Ls.

Ziņu sagataveja: LaKuGa