Grupai „Bez PVN” jauns albums i video klips

Grupai „Bez PVN” jauns albums i video klips

Piec puora godu pagreidis perioda ar radzamim muzykalim dorbim iz skotuvis atsagrīzuse grupa „Bez PVN” i 6. junī aicynoj iz grupys ūtruo albuma prezentacejis pasuocīni, kai ari pīduovoj apsavērt video verseju dzīsmei „TYLTS”.

6. junī 21.00 Reigā, Dailis teatra uora kopejneicā „Epikūra dārzs” grupa „Bez PVN” sovus draugus, atbaļsteituojus, fanus, medeju puorstuovus i cytus interesentus prīcuosīs redzēt iz grupys ūtruo albuma „Reits” atruodeišonys pasuocīni. Speitejūt myusu dīnu modernajom tehnologejom, grupa jaunū albumu īceriejuse izdūt vīnā eipašā eksemplarā magnetiskuos lentys formatā. Kai smej grupys dalinīks Kristaps: „Itūšaļt gondreiž sevkurs taustomais formats izdūšonai ir najiedzeigs, tod deļkam gon izdūt albumu lentē…?” Vys tik reizē, eimūt leidza laikam, „Reits” kotram interesentam tiks pīduovuots dabuošonai ari digitalajā versejā. Jaunajā grupys albumā byus īkļautys 10 da itam nadzierdātys ci moz dzierdātys dzīsmis. Albuma īrokstā grupai tolkā guojuši taidi muziki kai bundzinīks Mārtiņš Linde i čelliste Danuta Ločmele. Grupys stuosti, dzīsmis i latgaliskuo vīnkuoršeiba byus albuma atruodeišonys pasuocīņa bolsti. Grupys debejis albums „Pyrms vuorda” izguoja 2007. goda suokā i tyka nomināts Latvejis Muzykys īrokstu Goda bolvai kategorejā „Lobuokuo debeja”.

Leidza ar viesti par albumu, grupa aicynoj nūsavērt dzīsmis „TYLTS” video verseju, kas viestej par cylvāka dzeivis izvielem. Kai akteri, kurim itei ir debeja video muokslā, klipā pīsadalejuši 1 kivi, 1 apeļsins, 1 mandarins i 38 ūlys. Klipu taisejuse apvīneiba „Pagan People Productions”: režisors Guntis Rasims, muokslinīcyskais vadeituojs Raibīs, operators, gaismuotuojs Eduards Medvedevs, producenti „Latgolys Producentu Grupa”. Dzīsmis muzykys autors Kristaps Rasims, vuordu autori Kristaps Rasims i Guntis Rasims, dzīsmis īroksta apstruode – Uģis Vilcāns (mix, LTG) i Nick Dawes (master, FR).

Grupys „Bez PVN” īprīškejuo publiskuo dzīsme „Jei” i tuos video verseja izguoja 2009. goda vosorā. Pa itū laiku gruna na viņ aktivi struoduojuse studejā, nu ir mainejīs ari grupys sastuovs. Namaineigi grupā muzicej bruoli – akters, komponists Kristaps Rasims (bolss, elektriskuo gitara, cyti instrumenti) i jaunīšu lītu specialists, pasuocīņu vadeituojs Guntis Rasims (bolss, akustiskuo gitara). Kai ari – apvīneibys „Bruoli Auzāni i Jersokys slavanais orkestris” dalinīks, dīdžejs Jurs Vucāns (bolss, elektriskuo gitara, samplers, cyti instrumenti), basgitarists Valdis Vucāns i pi sytamajim instrumentim paleidz grupys „Momend” bundzinīks Normans Bārbals.

Goda beiguos grupa svieteis 10 godu pastuoviešonys jubileju. Pa itū laiku „Bez PVN” pīsadalejuši vaira kai 500 koncertūs i pasuocīņūs, dabuojuši dažaida mārūga veiksmis, bolvys i titulus leluokūs i mozuokūs festivalūs i konkursūs. Pasasokūt dzīsmis „Screen” sekmem, bejuši LR2 „Muzykaluos bankys” 2008. goda spylgtuokī debitanti.

Reitu, 1. junī, „Bez PVN” aicynoj iz Rēzekni, kur, turpynojūt Latgolys viestnīceibys „Gors” atkluošonys pasuocīņu sereju, kūpā ar grupu „Dabasu Durovys” i ukraiņu r’n’b duetu „Tamerlan i Aļena Omargalieva” uzastuos vokora koncertā „Te dejo!”.

Grupys aktivitatem sekoj leidza: http://twitter.com/BezPVN; https://www.facebook.com/grupa.BezPVN i http://draugiem.lv/bezpvn.

Karteņa: foto Baiba Buceniece
Sagataveja: Bez PVN

Komentari

Kalenders

Jul
15
Ūtr
19:00 Leivuona piļsātys svātki @ Leivuons
Leivuona piļsātys svātki @ Leivuons
Jul 15 @ 19:00 – Jul 19 @ 23:45
Ar pylnu svātku programu var īpasazeit ITE.
Jul
17
Cat
19:00 Izruode “Mazpiļsāta” @ "Ulbrokas pērle"
Izruode “Mazpiļsāta” @ "Ulbrokas pērle"
Jul 17 @ 19:00 – 21:00
“Pannas Teātris” skateituojim pīduovoj izruodi – slovonuokuos myusu dīnu Latgolys lugu autoris Danskovītis jaunuokū komedeju. Izruodis režisors Juris Rijnieks liks akterim Zanei Daudziņai, Aldim Siliņam, Elīnai Vānei, Jānim Skanim voi Jurim Lisneram runuot ari latgaliski[...]
Jul
18
Pīk
all-day Vikys Ekstys izstuode “Bēres Slo... @ galereja "Alma"
Vikys Ekstys izstuode “Bēres Slo... @ galereja "Alma"
Jul 18 all-day
Galerejā “Alma” byus apsaverama Reigys Fotografejis bienalis “Next 2025” programā īkļautuo Vikys Ekstys personalizstuode “Bēres Slobodā”. Izstuodis kuratore ir Astrīda Riņke. Dokumentalū video par ituos izstuodis dorbu kopiešonys procesu analogajā foto laboratorejā taisejs Kristians Fukss. [...]