„Bez PVN” Voldiks, kurs dzeivoj iz jumta

„Bez PVN” Voldiks, kurs dzeivoj iz jumta

Ar ūtrū albumu, koncertim, sātyslopu i jaunu sastuovu aktivu darbeibu atsuokuse latgalīšu grupa „Bez PVN”. Iz skotuvis radzami jau zynomī bruoli Kristaps i Guntis Rasimi, jim pīsavīnuojs Jurs Vucāns, kas, kai smej grupys bīdri, izduovynuojs Latgolai dzīsmi par opeli, bungys pīspielej grupys „Momend” bundzinīks Normans Bārbals, bet pi basgitarys niu kusteigs i prīceigs radzams Valdis Vucāns ci grupys bīdrim vīnkuorši Voldiks. Kas i kaids ir Valdis? Varbyut leluoka skaidreiba sasarass piec puora vaicuojumim.

„Bez PVN” albuma prezentacejis laikā daudzim beja vaicuojums, kas tys Voldiks taids ir. Kas tod jis ir?
Kas es asu? Grupys „Bez PVN” basgitarists. Asu Juram bruolāns i Aijis „muosa” Guntim i Kristapam. Es jūs pazeistu ari jau… kaidus godus sešus, pa munam.

Voldiks_V 01

Cyts vaicuojums tod byutu bejs, kai var tikt spēlēt grupā „Bez PVN”. Niu skaidrs – caur pazeišonūs…
Njāāā… (smejās) Caur pazeišonūs. Bet vēļ ir nūsacejums, ka juobyut pasystam iz dažaidom izdareibom i taidam, kū grupa pījem. Jī izviertej i tod secynoj, voi Tu esi gona lobs, kab spālātu grupā.

Cik atlasis kuortys Tev beja?
Maņ beja eksamens! I eksamenā beja divejis atlasis kuortys: muzykys spieliešona i iedīņa degustiešona aizsītom acim.

Kristaps Tevi raksturuoja ar vīnu vuordu, ka grupā Tu esi tamada
Nui, tei tamada myusim cīši meila tema. Tamada ir tys, kurs soka tostus, uzmundrynoj tautu i tai tuoļuok. Da tostu saceišonai es vēļ naasu tics publiski, bet mož i na cik i tuoļā nuokūtnē tys varātu nūtikt.

Tevi raksturuoja ar vīnu vuordu, bet kai Tu raksturuotu „Bez PVN”?
Oi… „Bez PVN” ir vysaiži. Cīši dzīvesprīceigi. Ar cīši lobu i izteiktu humoru izjiutu. Tys ir vīns nu leluokajim styurakminim, deļ kuo grupa ir kūpā. Vysod teik jūkuots, vysūs mieginuojumūs i storp tim. Myusim ir cīši lobys attīceibys na viņ mieginuojumu laikā. Sasakontaktejam, sasateikam ari taipat, doram vysaidys lītys kūpā. Vysim, ruodīs, ka ir taids kūpeigs redziejums iz dzeivi. Mes kotrs asam ari sovaiduoks. Drusku slinki, kurš kurluoks i tai tuoļuok.

Voldiks_V 03

Kū Tu dori kasdīnā?
Iz papeira es asu klasificāts kai nūdūkļu inspektors. Bet es nastruodoju tymā sferā, par tū ka… nu kai es tagad cylvākim praseišu nūdūkļus, ka pats spieleju grupā „Bez PVN”? Niu jau ostoņus godus es struodoju par jumiki-skuordnīku. Pa jumtim viņ dzeivojūs. Tī maņ cīši pateik. Augšā nivīns natraucej, tī ir klusai, labi pa dīnu. Bet es vysus nu augšys radzu. Saīt koč par puora stuovim, bet tyvuok Dīvam.

Kai Tu tyki taidā sferā?
Pabeidžu vydsškolu, atbrauču iz Reigu i gribieju pastruoduot. Suoku struoduot, palyku struoduot i tai i tāņ struodoju. Nūdūkļu inspektorus pabeidžu deļtuo, ka piec vydsškolys beja kur ta juosavuica. Es daže nazynu, kai es izdūmuoju tī pasavuiceit. Pabeidžu, bet maņ tei tema nav meila, deļtuo ari nastruodoju.

Kaidys Tev ir sajiutys, kod Tu redzi sovu pabeigtū jumtu?
Tagad jau ir tai, ka, ejūt pa Reigu, es radzu – vīns jumts muns taiseitais, ūtrs. Ir tai: suocūt jaunu, tu atej, nūviertej i ir drupeit taida īškeja sajiuta – koč kas kņut – deļ tuo, ka kotrs jumts ir sovaiduoks. Metodis vīnaidys, bet jumts sovaiduoks. Tod tu suoc jū taiseit. Nu suoku izprūti, izdūmoj, kai tu taiseisi, puorzalomoj ar vysim īspiejamajim dorba vadeituojim i arhitektim, tod dori. Pats process cytu reizi apād vaira nervu, kai grybātu, bet ir cīši loba sajiuta, kod tu pabeidz tū sātys capuri. Nūkuop nūst, paej metrus symts, voi cik jau saīt, atpakaļ, verīs iz jumtu i dūmoj: „Jā, es atguodoju, ka ite jumta vēļ nabeja, nu niu jis irā!”

Kurs ir bejs Tovs cikom leluokais izaicynuojums?
Doma bazneica. Divejus godus jumeju pa tīni. Gondreiž vysu jumtu mes iztaisejom ar kolegi divatā. Vysi latgalīši niu var īt garum i lepuotīs ar Doma bazneicys jumtu. Varbyut i deļ tuo maņ Dīveņš ļuove spēlēt grupā. Nu tai i saguoja – kod pabeidžu Doma bazneicys jumtu, es suoču spēlēt „Bez PVN”.

Voldiks_V 02

Kas Tev kai Valdim vēļ pateik?
Maņ pateik vosorā braukt ar ritini, zīmā ar snovbordu, pavasarī pieteit mārgu jaunūs tārpus i rudinī laseit mežā sieņs. Agruok cīši patyka ēst gatavēt, nu niu taids periods dzeivē, kod vyss taids sasteigts i jaunys ponnys vēļ nav nūpierktys. Bet gon jau, ka tei dzela nikur tuoli naatpaliks. Pateik aizbraukt gostūs iz Preilim, iz Latgolu pi mamys, pa laukim atsapyust.

I kai ar napatikšonu?
Napateik…? Es jau taids smaideigs, lobs cylvāks – maņ vyss pateik. Cytim grupā tī reizem vyss sļikti, voi ir vīns sovs pareizais vīdūklis, bet maņ cīši reši ir koč kas taids, kas napateik.

Albuma prezentacejā Aigars i Ingars nu „Borowa Mc” beja gotovi Tev fanklubu taiseit. Ar sovu dzeiveigumu beji jūs favorits. Voi Tev nav baist itai saslimt ar zvaigžņu slimeibu?
Es dūmoju, ka nā. Nazynu, kas ir zvaigžņu slimeiba. Albums jau ir izdūts i ka naasu saslims, mož vaira i nasaslimšu.

Bet lampu drudzs Tev ir?
Pyrma koncertim – jā! Tai kai maņ ir bejs daudz koncertu (smejās) – vasali četri – tod pyrma kotra koncerta ir nalels uztraukums. Bet tys pazyud trešajā dzīsmē. Pyrmajā dzīsmē ir tai, ka juosaver iz pierstim – ka tik koč kū nasajaukt. Ūtrajā dzīsmē Tu jau saprūti, esi īsaspielejs i trešajā tod jau aizīt. Vysi ir sasavāruši vīns iz ūtra, sasasmaidejuši, tod jau palīk vīgļuok i piersti kustīs lobuok, dūmys raisās uotruok.

Cik seņ Tu spielej basu?
Nu pārnuo goda beigu. Pyrmū reizi basu pajiemu rūkā oktobrī. Tagadejai grupai „Bez PVN” tūlaik jau  sastuovā bez basista i bez bundzinīka beja mieginuojums, i es beju tī atguojs kai gosts. Nazynu, voi maņ sātā nabeja kuo dareit, voi atbrauču reizē ar jim nu Latgolys, voi kai tī beja. Zāni izguoja nu mieginuojumu telpys, īdeva maņ rūkā basgitaru i pasceja: „Voldik, še, pasavuici spēlēt basu! Ka tev saīs spēlēt basu, tod tev saīs spēlēt basu (atkluosme). Nasaīs, nu vysmoz byusi paraudzejs spēlēt basu. Švakuok jau nabyus.” Pa tuo mieginuojuma laiku īsavuicieju vīnu melodeju nūspēlēt. Nu i tai suoču vuicētīs vaira.

Bīži kasdīnā trenejīs?
Es cenšūs, teoretiski, kotru dīnu vysmoz stuņdi. Es zynu, ka tys ir pamoz i ir dīnys, kod maņ nasaīt, bet es cenšūs. Cytu reizi saīt vaira kai stuņdi – tys atkareigs nu garastuovūkļa. Bet es raugu atsasēst paspielēt kotru dīnu. Dorba dīnys maņ ir jumtim, vokori i breivdīnys muzykai.

Kura nu „Bez PVN” dzīsmem Tev pateik vysvaira?
Tys ir atkareibā nu situacejis i nu apstuoklim. Cytreiz sastdīnis reitā var patikt „Loopi”, pīktdīnis vokorā „Zuoleite”. Bet vyspuor es asu pamanejs, ka maņ pateik vysys dzīsmis, kū mes spielejam (smejās). Maņ pateik juos spēlēt, pateik klauseitīs.

Voldiks_V 04

Voi Tu pats ari esi raudzejs raksteit dzīsmis?
Naasu raudzejs. Vēļ cikom nā. Cytu reizi, sātā siežūt, vīns pats džemoju – pabļaunu, padzīdu. Da kuorteigai dzīduošonai gon vēļ kai da Maltai kuojom nu Reigys.

Prezentacejā „Bez PVN” saceja paļdis mūzom par īdvasmu. Kas Tevi īdvasmoj?
Kas mani īdvasmoj? Prūtams, ka maņ ir mūza. Jei staigoj maņ vyslaik pakaļ, kuop ar mani iz jumta. Ha. Vyspuor maņ cīši pateik tys, kū es doru tī iz skotuvis. Tei ir muna mūza. Laikam prīca viertīs iz cylvākim, kurim pateik, kai grupa „Bez PVN” spielej. Paļdis jim!

Voi par muzyku Tu jau sapņuoji bierneibā? Par kū Tu vyspuor gribieji byut?
Maņ nabeja taida sapyna, ka es bierneibā grybātu byut tī policists, guņsdziesiejs voi… rokzvaigzne. Es daže pyrma goda par vysim 100 % beju puorlīcynuots, ka es nikod nakuopšu iz skotuvis i naspieliešu koč kaidu instrumentu, pīmāram, basgitaru. Bet nu redz kai dzeive sasagrīž, ka niu juospielej!

Cik bīži Tu itai ļaunīs dzeivis īspiejom?
Vai, vysu laiku, maņ ruodīs! Es asu dzeivei taids dīzgon atvārts cylvāks. Maņ pateik paraudzēt vysu laiku koč kū jaunu.

Voi esi dūmuojs par vēļ kaidu muzykys instrumentu?
Vīnu breidi sev golvā drusku, drusku beju īdzyns taidu dūmu, ka varātu paraudzeit kontrabasu, kas taida lela basgitara viņ ir. Bet nūpierkt i sev jū sātā turēt, tys nav tai cīši labi. Vīneigi, ka jū varātu izmontuot kaiduos dzīsmēs voi iz atseviškom dzīsmem iz skotuvis iznest. Pateik maņ, kai tys kontrabass izaver. Taids lels! Bet nu dzeive ruodeis, kai tī saīs. Par agri sprīst navajag.

Koncertūs puiši uzsver, ka esi šmukuokais nu grupys, breivs i ka mārgys var pīsasaceit ryndā. Kaida tod ir atsauceiba?
Cik daudz koncertu ir bejs, tik ari lela atsauceiba (smejās). Leluokuo atsauceiba tāņ beja laikam piec albuma prezentacejis. Bet es naasu rokzvaigzne. Zam lūgim fanu bors nastuov i es ari nagrybātu, kab tai byutu. Cytreiz ir tai, ka vīnā dīnā socialajūs teiklūs ir par daudzi uzaicynuojumu nu dažaidom personom. Tai kai maņ ir gryuts atsaceit cylvākim, tod reizem tys saīt drupeit apgryutynūšai… Bet reizē, ka tys koč kaidā veidā paleidz grupai, tod es asu ar mīru sevi zīduot!

„Bez PVN”, kai jau zynoms, ir nūstuoja, ka dzīd taidā volūdā, kai dūmoj. Kaids ir Tovs latgalīšu volūdys stuosts?
Es asu runuojs latgaliski vysu laiku i nu tuo nasakautreju. Maņ ari dorba bīdrs ir latgalīts. Vysleidza – Reigā, Ventspilī, kod struodojam, vysod runojam latgaliski. Ir forši apsavērt nu molys iz cylvākim – ir kuri paprosa, voi mes franciski runojam, voi kaidā volūdā mes vyspuor tī runojam… Ka runoj mudri latgaliski, tod cylvākim nu molys ir gryušuok iztvert. Bet tys līk pasmaideit. Latgalīšu volūda ir pluss. Es zynu vīnu volūdu vaira kai cyti, kurī nazyna! I es lepojūs ar tū.

Voldiks_V 05

Kaidys ir Tovys asociacejis, kod suoc saukt itaidus vuordus… Pyrmuo
Reits.

Tylts
Red Hot Chilli Peppers

Viejs
Viejs. Nu tīšom viejs. Gaisa plyusma. Deļ kuo maņ nav cytys asociacejis ar vieju? (naizpratnē smejās)

Grybu dzeivuot
Guntis buorzdā.

Vyss vīns
Nu asociejās ar Kristapu. Jis jū nu suoku beja īdzīduojs.

Zuoleite
Ha, ha, ha. Nu, zuoleite… Lai byutu itei zuoleite, kas parkā.

Bolts. Kluss. Navaineigs
Na asociaceja, bet cīši spilgti atmiņā ir palics tys Kristapa tārps, kas jam beja SeMā (seņuok raidejums LTV7), kod jī tī akustiski spielieja. Tod vēļ Aija beja. Maņ tys tārps atmiņā plaiksnej.

Vuordu cīš daudz
Ar koč kaidu trauceni. Varātu byut cukra trauceņš, kurs ir pylns ar koč kū. Tī vuordi laikam vydā.

Asom tepat
Asom tepat… dzīsme. Palikšona. Es nikod naasu braucs struoduot iz uorzemem. Ir bejušys dūmys vīnu mozu breiteņu, ka mož paraudzēt, teiri tai pasavērt, kai tī ir. Cyti struodoj, bet es saprotu, ka nagrybu vyspuor nikur braukt. Maņ tepat ir perfecto!

Kas Tev dora tū lobū sajiutu ite?
Lobuo sajiuta ir, ka es doru koč kū ite Latvejā – piec manis palīkūšu. Ari maņ ir draugi, kuri struodoj uorzemēs. Jī atbrauc, i es verūs iz cylvākim, kas struodoj dorbus, kurūs nagryb struodot. Bez kaidom izaugsmis īspiejom. Tys, pa munam, nav pareizi. Vajadzātu cylvākam dareit tū, kas jam pateik, interesej. Vēļ es asu puorsteigts par jūs iesšonys paradumim. Atbrauc draugi pi manis gostūs, es taisu jim vakarenis, a jī lelom acim šokā verās, ka „tu i salatus pats taisi, i buļbus vuorej?” Tei ir līta, kas maņ otkon līk īplest acs. Braucit vysi atpakaļ, byus foršuok!

I tod pādejuo… Reits
Vīna asociaceja: vosorys agrys reits. Puspīci nu reita, varbyut pat četri. Kod mygla vēļ turīs i saule lāc. I tys nav piļsātā. Dreižuok koč kur Latgolā iz grants ceļa. A ūtra taišni i ir dzīsme „Reits”, kas asociejās ar stresu, jo koncertūs juospielej pyrmuo. Tod vēļ juosaver iz pierstenim, kab nasajiukst…

Ar Voldiku sasarunuoja Edeite
Kartenis: Baiba Buceniece i nu grupys “Bez PVN” arhiva