Īprīškejuos nedelis vydā, kab padareitu pasauli i cylvākus smaideiguokus, grupa „Bez PVN” suoce izplateit muzykalu narkotiku – dzīsmi „Zuoleite”, nūsyutūt tū sovim draugim i atbaļsteituojim. Šudiņ grupa pīduovoj nūsavērt dzīsmis videoklipu, kas taiseits nu pīcgadeiga bārna ar teleponu safiļmātuo materiala.

Īsadvesmojūt nu datorspielis „Minecraft”, grupys „Bez PVN” dalinīka Gunta Rasima pīcgadeigais dāls Andžejs safiļmieja sovys kasdīnys gaitys ar prostu mobilū teleponu. Itys materials tod ari ir par pamatu dzīsmis „Zuoleite” videoklipam.

Video taiseituoji ar klipa paleidzeibu, izmontojūt datorspielis alegorejis, apspielej cylvāka kvalitativi nūdzeivuota myuža ideju – prast viertīs dzeivi bārna acim.

Videoklipa operators ir Andžejs Rasims, montažu taisejs Guntis Rasims. Dzīsmis „Zuoleite” vuordu i muzykys autors ir Kristaps Rasims, dzīsme īraksteita studejā „Reiga”, īroksta apstruode – Uģis Vilcāns (mix, LTG) i Nicsk Dawes (master, FR).

Nu šudiņdīnys „Bez PVN” dzīsmi „Zuoleite” kotrs interesens var bez moksys dabuot grupys Soundcloud profilā https://soundcloud.com/bezpvn/bez-pvn-06-zuoleite

Sagataveja LaKuGa piec “Bez PVN” publicitatis materialim
Kartenis autore Baiba Buceniece, nu grupys arhiva