TED breivpruoteigais tulkuotuojs i TED latvīšu volūdys tulkuošonys projekta koordinators Kristaps Kadiķis aicynoj vysus latgalīšu volūdys pratiejus īsasaisteit niule kai aizsuoktajā tulkuošonys projektā. Sekojūt taida poša latvīšu volūdys projekta pāduos, sataiseits, lai styprynuotu latgalīšu volūdu myusdīnu škārsteikla pasaulī, kai ari latgalīšim padareitu pīejamu TED saturu jūs dzymtajā – latgalīšu volūdā.

Kas tod ir TED?
TED (nu angļu volūdys vuordim „Technology, Entertainment, Design”) ir 1984. godā privatys bezpeļnis organizacejis „Sapling Foundation” aizsuokta konferenču sereja ar saukli „Idejis, kuruos daleitīs”. Godu gaitā vysaiduos konferencēs ir izastuojuši taidi pasaulī ītekmeigi cylvāki kai Bils Klintons, Bils Geitss, Ričards Brensons, Google dybynuotuoji Lerijs Peidžs i Sergejs Brins, kai ari naskaitami Nobela premejis laureati.

Suocūt ar 2006. goda juni izastuošonu videoīroksti bez moksys apsavieršonai teik dalikti TED sātyslopā, i nu 2009. goda maja ir pīejamys tūs transkripcejis (subtitri), kū īspiejams puortulkuot cytuos volūduos. Itūšaļt pavysam ir publicēti gondreiž 50 tyukstūši tulkojumu 103 volūduos, tūs vydā ari vaira kai 250 – latviski. Pādejūs divejus godus Latvejā veiksmeigi nūtykušys ari naatkareigi reikuotys TED formata TEDxRiga konferencis.

Par pyrmū tulkuojumu izvālāta leidz itam vysvairuok volūduos puortulkuotuo Dereka Saiversa runa „Sovaiži voi vīnkuorši cytaiduok?”, kurā jis stuosta par tū, cik vysaiduos pasauļa vītuos var byut dyžan atšķireigs prīškstots par tū, kas ir normals i pošsaprūtams. Eisa pavuiceiba tulkuošonys izsuokšonai ted.com(angliski).

Ka roduos kaidi ar TED, Amara ci tulkuošonu saisteiti vaicuojumi, var sasazynuot ar Kristapu Kadiķi, rokstūt privātu viestuli.

Ziņu sagataveja: LaKuGa piec K. Kadiķa dūtuos informacejis
Karteņa: ekranšuovīņs