Pītera dīnā Kuorsovys nūvods aicynuoja gostus iz Malnovys maizneicu “Dzīles”, kur tyka padūts pyrmais lauku lobumu brančs Latgolā. Tradicionaluo latgalīšu kukne, spāka putra, sātys sīrs i kiupynuota gaļa ar malnū maizi mejuos ar svātku peirāgim i uzkūdom.

Brančs aba vāluos brūkaškys ir veids kai sevi i saimi breivdīnuos palutynuot ar gordu iedīņreizi, satikt sābrus, īpazeit jaunus interesantus cylvākus i kavētīs pateikamuos sarunuos omuleigā atmosferā.

Pyrmais Latgolys brančs Kuorsovys nūvodā puļcēja kūpā i vosorys dorbūs īrautūs sābrus, i jaunus gostus nu Latvejis tuoluokajom molom. Baudūt saimineicys Ainys gordū maļteiti, tyka meitys sarunys par byutiskom i vīnmuļom temom. Nūbaudeitū beja vareiba ari īsaguoduot Latgolys tematiskūs cīmu “Tierga cīmā”, kas pīduovuoja kvalitativu vītejūs sātys ražuotuoju produkceju – zivs, cyukgalis veitynuojumus, pošbryuvietu aļteņu, svaigi sītus sīrus, veinu, Latgolys uorēs augušus čajus, madu i aromatisku maizi.

Kai jau tradicionali Latgolā, dejis i dzīsmis naformalā gaisūtnē nūslēdze pyrmū sātys ražuotuoju svātdīnis branču. Nūviertejūt cylvāku interesi, vālajom brūkaškom latgalīšu tradicejuos byus ari ūtrais cielīņs, sekojit informacejai i gastej vīsmīleigajā Malnovys maizneicā “Dzīles”.