Kinofestivala “Open Place” GrandPrix sajāmuse eiskina nu Dānejis

Kinofestivala “Open Place” GrandPrix sajāmuse eiskina nu Dānejis

20. augustā Rēzeknē ar svineigu koncertu nūsaslēdze II Storptautiskais eiskinu festivals “Open Place”, kurā ūtrū godu piec kuortys golvonū bolvu – festivala Grand Prix – sajēme eiskina nu Dānejis: itūreiz dāņu režisora Teja Molstroma Kristensena (Theis Mølstrøm Christensen) dokumentaluo eiskina “Dissonans”.

Eiskinys tyka apbolvuotys 4 nominacejuos i sajēme ari 3 eipašuos bolvys. Kai “Lobuokuo dokumentaluo eiskina” bolvu sajēme vēļ vīna dāņu režisora Karla Olsona (Carl Olsson) eiskina “Lai svieteita ir itei vīta” (Velsignet være dette sted), par “Lobuokuo eismetražys spēlkina” bolvu sajēme pūļa Bartoša Kruhlika (Bartosz Kruhlik) kina “Korstums” (“Žar”), “Lobuokuos animacejis eiskinys” bolvu sajēme latvīša Edmunda Jansona dorbs “Kora turneja”. E. Jansons dabuoja ari ceļuojumu agenturys “Impro” eipašū bolvu kai kinofestivala veiksmeiguokais latvīšu izceļsmis režisors. Rēzeknis piļsātys dūmis eipašuo bolva par kinu “Myusu borguo zīma” (Nasza zima zla) ceļuos iz Pūleju pi režisora Gžegož Zarični(Grzegorz Zariczny), nu skateituoju simpatejis bolvu sajēme Krīvejis režisore Anna Janovskaja (Анна Яновская) par eiskinu “Lobais cylvāks” (Chelovek-dobro).

Ituo goda kinofestivala konkursa programā pīsadaleja 27 eiskinys, kū veiduojuši jaunī režisori nu Latvejis, Lītovys, Igaunejis, Pūlejis, Dānejis, Vuocejis i Krīvejis. Jaunūs režisoru veikumu izviertēja kompetenta žūreja, kurys sastuovā beja vairuoki kino profesionali: kino režisore i pasnīdzieja Laima Žurgina, Baļtejā leluokuo storptautiskuo eiskinu festivala “2ANNAS” producente Amanda Boka, kino i video muokslys pasnīdzieja Agnese Ivane i kino konsultants, vīns nu Ūmeo storptautiskuo kinu festivala (Zvīdreja) dybynuotuoju Toms Palmens (Thom Palmen), kai ari režisore i producente Ināra Kolmane.

Nūslāguma koncerta dalinīki, festivala dalinīki, jaunī režisori i žūrejis puorstuovi atzineigai nūviertēja Rēzeknis piļsātu, Latgolys viestnīceibys GORS īspiejis, komandys spāku i festivalā aizsuoktū dorbu. Žūrejis prīšksādātuoja Laima Žurgina atzyna, ka “rēzeknīši var byut lepni, ka piļsātā īīt pasauļa kultura i ka tuos perspektivys ir cīši lelys”. Taipat žūrejis puorstuovi paslavēja piļsātu i koncertzalu par drūsmi itaidus pasuokumus reikuot uorpus golvyspiļsātys.

Kinofestivals “Open Place” itymā godā festivala ītvorūs pīduovuoja daudzveideigu i plošu kulturys programu, kab festivala nūrisēs varātu pīsadaleit i sev interesejūšus pasuokumus atrast sevkurs interesents – paraleli konkursa kinu programai lelu rēzeknīšu atsauceibu sajēme uorpuskonkursa kinu programa, kai eipašs kino pīdzeivuojums izavērte simfoniskuos muzykys koncerts “Simfoniskais kinematografs”, taipat pyrmū reizi festivala ītvorūs tyka organizieti tikšonuos vokori ar teatra i kino akterim.

Festivala nūslāguma koncertā nūtyka na viņ svineiga bolvu padūšona, nu ari i vītejūs, i gostu muokslinīku uzastuošona. Rēzeknīšim i piļsātys gostim beja vareiba vēļreiz pīdzeivuot deju kūpys “Dziga” i horeografis Lilijis Liporys dejis uzvadumu “Byut kūpā”, ar pasaulī i Latvejā zynamom dzīsmem prīcynuoja Rēzeknis bigbends i dzīduotuojs Andris Ērglis, kai ari kinofestivala nūslāgumā pīsadaleja Krīvejis kino i teatra akteri Valentīna Talizina, Irina Švedova, Sergejs Koļesniķovs i Aristars Ļivanovs. Koncertu vadeja Latgolys viestnīceibys GORS vadeituoja Diāna Zirniņa i Krīvejis akters, TV raidejumu vadeituojs Vjačeslavs Manučarovs.

Storptautiskais eiskinu kinofestivals “OpenPlace” aizasuoce 2013. godā ar mierki popularizēt Eiropys jaunuokuos i lobuokuos eismetražys kinys, veicynuot Latvejis kinematografa atteisteibu, kai ari veiduot jaunu i talanteigu kino nūzaris profesionaļu pīredzis apmaiņu i sadarbeibu. Taipat kinofestivala “OpenPlace” aizdavums ir veicynuot Rēzeknis kai Latgolys kulturys i turisma centra atpazeistameibu i kinematografistu sadarbeibu Baļtejis regiona i Eiropys leimenī. 2014. godā kinofestivalā uzsvors tyka lykts iz jaunūs kino režisoru vītu, dūt vareibu paruodeit i pīruodeit sovus spākus storptautiskā leimenī.

Ziņa sagataveita piec Latgolys viestnīceibys GORS dūtuos informacejis

Kartenis: Māris Justs

 

Print Friendly, PDF & Email

Nūtikšonu kalendars

Jun
19
Sai
09:00 Lielais latgaļu tirgus Ludzā @ Ludza
Lielais latgaļu tirgus Ludzā @ Ludza
Jun 19 @ 09:00 – 14:00
Lielais latgaļu tirgus Ludzā @ Ludza
19. junī nu 9.00 leidz 14.00 stuņdem Ludzys vacpiļsātā byus Lelais latgaļu tiergs.  Vaira informacejis par tiergu ITE.   
Jun
24
Cat
19:00 Jura Ostrovska 40 godu jubilejis... @ Mozuo Ludzys azara krosts
Jura Ostrovska 40 godu jubilejis... @ Mozuo Ludzys azara krosts
Jun 24 @ 19:00
Jura Ostrovska 40 godu jubilejis koncerts "Hej, bruoļ, latgalīt" @ Mozuo Ludzys azara krosts
24. junī 19.00 stuņdēs grupys “Dvinskas muzikanti” dalinīks Jurs Ostrovskis svieteis sovu 40 godu jubileju ar koncertu Ludzys azarā. Grybātuoji ir aicynuoti nūsadrūsynuot ar piknika pakluojenim i īt iz Mozuo Ludzys azara krostu, lai varātu[...]
Jun
27
Svā
20:00 Māra Čačkys personalizstuode “Kl... @ Daugovpiļs Nūvodpietnīceibys i muokslys muzejs
Māra Čačkys personalizstuode “Kl... @ Daugovpiļs Nūvodpietnīceibys i muokslys muzejs
Jun 27 @ 20:00
Māra Čačkys personalizstuode "Klātienes dialogi" Daugovpilī @ Daugovpiļs Nūvodpietnīceibys i muokslys muzejs
Nu 7. leidz 27 juņam Daugovpiļs Nūvodpietnīceibys i muokslys muzejā var apsavērt muokslinīka Māra Čačkys lelformata dorbu personaliztuodi “Klātienes dialogi”. Izstuode īzeimej sasatikšonu jeb īspieju otkol apmeklēt muzejus i izstuodis kluotīnē, publiski sasatikt ar Māra[...]
Jul
4
Svā
20:00 Tematiskuo izstuode “Politiķei, ... @ Latgolys Kulturviesturis muzejs
Tematiskuo izstuode “Politiķei, ... @ Latgolys Kulturviesturis muzejs
Jul 4 @ 20:00
Tematiskuo izstuode "Politiķei, pedagoģei un sabiedriskajai darbiniecei V. Seilei 130" @ Latgolys Kulturviesturis muzejs
Atzeimejūt pedagogis, politikis i sabīdryskuos darbinīcis Valerejis Seilis (1891-1970) 130 jubileju, nu 15. maja da 4. juļa Latgolys Kulturviesturis muzejā varēs apskateit tematiskū izstuodi par gūdu V. Seilei, kai ari īsapazeit ar juos davumu i[...]
Jul
16
Pīk
20:00 Dasasaceišona vosorys kursim “Vo... @ Tīšsaistē
Dasasaceišona vosorys kursim “Vo... @ Tīšsaistē
Jul 16 @ 20:00
Dasasaceišona vosorys kursim "Vosoruošona 2021" @ Tīšsaistē
Nu 8. da 14. augusta Rēzeknis nūvoda Rogovkā nūtiks latgalīšu volūdys i kulturys vosorys kursi “Vosoruošona – 2021”. Tymūs aicynuoti dasadaleit školuotuoji nu vysys Latvejis, kas školuos vuica ci tyvuokajā laikā planavoj vuiceit latgalīšu rokstu[...]