31. oktobrī 17.00 muokslys salona “Luode” izstuožu telpā (Krosta īlā 31, Rēzeknē) vysi interesenti aicynuoti iz Laikmeteiguos muokslys centra lekceju – video programu “Jaunuokuo kusteiguo attāla muoksla Baļtejā”.

Video kai medejs teik namiteigi patārāts myusu kasdīnā. Vizualajā muokslā video kai tehnika laika gaitā ir modificiejusēs, pījamūt hibridformys, kas kūpumā apzeimiejamys kai kusteiguo attāla muoksla. Kusteiguo attāla dorbi var tikt izruodeiti vysaidūs veidūs: projekcejuos, instalacejuos, kinoteatrī, galerejuos i virtualajā vidē.

Itamā programā byus apsaverami Baļtejis kusteiguo attāla muokslys dorbi, kas radeiti vizuala baudejuma i puordzeivuojuma raiseišonai skateituojā, reflektejūt par myusu dīnu kulturā aktualom tendencem i tematiski, i stilistiski.

Lektore Anna Veilande – Kustikova ir kusteiguo attāla muokslys pietneica, kas studiejuse Latvejis Muokslys akademejis muokslys teorejis nūdaļā i Igaunejis Muokslys akademejis animacejis nūdaļā, kur vāluok struoduojuse ari par pasnīdzieju. Anna Veilande – Kustikova dorbuojusēs kai Latvejis Videomuokslys arhiva vadeituoja, itūšaļt, kluotyn pi pietnīciskuo i lektoris dorba, ir kinu festivala  “Divejis Annys” kuratore i programu direktore.

Karteņa nu Laikmeteiguos muokslys centra arhiva: lektore Anna Veilande – Kustikova