4. novembrī Baltinavas vidusskolas Paaudžu centrā notika Rēzeknes Augstskolas folkloras ekspedīcijas DVD “Baļtinovys receptis” prezentācijas pasākums.

2013. goda vosorā Rēzeknis Augstškolys folklorys ekspedicejis dalinīki gasteja Baļtinovā, kab veiduotu video sižetus i intervejis ar myusu pusis dzeivuotuojim, par tradicionalajim latgalīšu iedīnim, īcīneituokajim iedīnim kotrā saimē. Ekspedicejis laikā kūpumā nūfilmāts ap 12 stuņžu gars video, tok kinā itī video samontāti iz 1 stuņdi.

Īsasuocūt pasuokumam, Baļtinovys vydsškolys direktors Imants Slišāns kluotynasūšūs sveicynuoja nūzeimeigajā pasuokumā. Direktors pasasaceja Rēzeknis Augstškolys puorstuovim par īguļdeitū dorbu, Baļtinovys populariziešonu, latgaliskūs vierteibu dokumentiešonu. Ari nūvoda dūmis prīšksādātuoja Lidija Siliņa saceja pateiceibys vuordus par apjūmeigū dorbu, īguļdeitajom pyulem. Baļtinovys himnu nūdzīduoja Baļtinovys vydsškolys ansamblis “Vērmelīte”.

Kina sastuov nu vairuoku daļu, kuruos baļtinavīši atkluoj sovys “Spāka receptis”, raksturoj Baļtinovys dzeivuotuojus, dūd īskotu nūvoda viesturē, stuosta atminis par bierneibā īcīneituokajim iedīnim, kai ari sovys iedīņu gataveišonys receptis.

 Piec kinys nūsavieršonys RA puorstuovi, pasnīdzieja Ilga Šuplinska, Sandra Ūdre pasasaceja atsauceigajim baļtinavīšim, kas īsasaisteja video sižetu radeišonā. Ar vysim izguojušajim DVD, kas radeiti folklorys ekspediceju laikā vairuoku godu garumā, īpazeistynuoja Angelika Juško – Štekele. Baļtinavīši kotrs tyka pi sova “Baļtinovys receptis” DVD eksemplara, apbolvuoti tyka ari tī stuostnīki, kuru sižeti kinā natyka īkļauti. Pasuokuma oficialuos dalis izskaņā sovu muzykalū sveicīni izdzīduoja etnografiskuo ansambļa dzīduotuojis Marijis Bukšys akordeona spēlis pavadejumā.

Tai kai kina tyka veiduota par tradicionalajim iedīnim, pasuokuma dalinīki kotrs saryupēja sovus gataveitūs tradicionalūs iedīņus, uzkūdys. Piec pasuokuma, pi kopeja, puorrunojūt īspaidus par kinu, dalinīki degustēja saguoduotūs iedīņus.

[Show slideshow]

◄ 1 2