16. novembrī Daugovpiļs Lada hallis 15 godu jubilejā paradzāts cīši kruošņs šovs, kurā byus vareiba atsavērt iz lada hallis viesturi, kai ari īraudzeit nuokūtnis sporta zvaigznis.

1999. goda 16. novembrī tyka oficiali atkluota lada halle, i reit tiks atzeimuots jau 15. jubilejs. Itamā laikā lada hallē pīradzāti i kruošni muzykantu i daiļsliduotuoju prīšknasumi, i ari aizvadeitys cīši spraigys vysaida leimeņa hokeja spēlis.

Svineiguos dalis laikā (nu 15.00) byus pīduovuota vareiba nūsavērt video “Daugovpiļs Lada hallis viesturis šaļts”, kai ari nūviertēt Daugovpiļs daiļsliduotuoju i hokejistu prasmis. Pasuokuma organizātuoji sūlej kruošņu šovu, partū aicynoj vysus piļsātnīkus i gostus īsarast iz lada halli.

Jau piec svineiguos dalis nūslāguma, kas ritēs apmāram 30 minutys, skateituoji varēs vāruot Latvejis 1. leigys hokeja spēli storp Daugovpiļs i Valmīrys komandom, a vokorā piļsātnīki teik aicynuoti iz svātku sliduošonom-diskotekom. Svareiguokajim dīnys pasuokumim īsiļdeis grupa “Diksilenda”, kas foajē uzastuos nu 14.30.

Vysi pasuokumi, atskaitūt diskotekys, byus bez moksys. Diskoteku īīšonys cena byus leidzvierteiga īīšonys moksai par vīnu sliduošonys stuņdi.

Vairuoku nedeļu garumā foajē byus vareiba apsavērt ari foto izstuodi “Latvejis Hokeja viesture”.

Karteņa: lhf.lv