Sevkuram ir sovys gaitys iz zemis. Sovs īdūtais laika vektors – deigšonai, augšonai, pumpuruošonai, zīdiešonai, brīdumam i siermumam. Skriejīņam i gausumam. Dūšonai i jimšonai. Kluotbyušonā i atguoduojumūs. Sevkura sirds stuņdinīks dzeivis dīnvydā ir apjiemeibys pylns atstuot pādys, īstateit ūzulu ci līpu, izceļt sātu, izaudzynuot dālu. Adventa laikā J. Soikana Ludzys muokslys škola aicynoj pīminēt, atguoduot par dzejnīku, muokslinīku, kulturys darbinīku Ontonu Kūkuoju, kas 2014. goda 23. decembrī svieteitu sovys dzimšonys dīnys 74. goda dīnu.

Rodūšais, koloritais, “trokais” rogovkīts 7 godus kai myužeibā, tok juo īsuoktī dorbi rūd spāku byušonā. Ceļš iz dzymtū sātu Rudukūs gluds i ībraukts. Nūdybynuotuo muokslys škola Ludzā mainuos, palykdama uzticeiga pamatūs īlyktuom vierteibom – Latgolys kultura, gimeniskums i muokslys dzīdynūšais spāks mīsai, goram, dvieselei, individam i sabīdreibai kūpumā. Latgolys sātu puortūs kiup sylta guņs Ontona dāla myurātajūs cepļūs. “O bļakys” īsuoktūs trikmīņus ritmā izsyt unuks. Pūdnīku saime grīž i lepej pūdus. Ailinīki turpynoj salikt vuordus ritmiskuos vīneibuos, kab pastuosteitu par jiutu pasauli. Zynuotnīki, studenti, unučka pietej Ontona literarū un muokslinīciskū davumu Latvejis kulturys kontekstā. Īspiejams, ka paīs kaida seikšalteņa pyrms skaiteituoju īraudzeis Ontona Kūkuoja latgalīšu dzejis izlase i napabeigtuo gruomota “Ķīvītāns”, to kkaida ES projekta rezultats tiuļeņ byus taustoms i lītojams kai školuos, tai vīnkuorši sātā. Tei ir kruosojomuo gruomateņa par Ontonu Kūkoju i muokslinīku nu Boltkrīvejis Jezupu Drozdoviču. Taipoš ir sagataveits metodiskais materials deveņom nūdarbeibom, kas, līkūt pošā videnī  vīna cylvāka dzeivis nūtikšonys, stuosta par kulturys tradicejom, omotnīceibu,  viesturiskom nūtikšonom Latgolā i  muokslys lykumim. Vysam sovs laiks i sova vīta. Skriejīņam i gausumam. Dūšonai i jimšonai. Kluotbyušonā i atguoduojumūs. Pīmynūt, puorskaitūt, puortiemejūt atstuotūs nūspīdumus – Ontona Kūkuoja dzejis i prozu, gleznys i kinys Adventa garajūs i sveču gaismys pīpiļdeitajūs vokorūs.

Autore: Sandra Vuorkale