Zīmyssvātku egleitis īdegšona Ontona i Annes Tematiskajā parkā

Zīmyssvātku egleitis īdegšona Ontona i Annes Tematiskajā parkā

Zsvatki Baltinova

Aizvadeitī Zīmyssvātki Ontona i Annes Tematiskajā parkā Baļtinovā tyka nūsvieteiti ar leiksmom dzīsmem. Zīmyssvātku egleitis īdegšonys pasuokums nūtyka 23. decembrī – pyrms poša svātku vokora, uzburūt Baļtinovys nūvoda īdzeivuotuojim dubultu svātku sajiutu. Pasuokumā vīnuvīt sasatyka gon teatra izruodis „Ontons i Anne” varūni, gon Baļtinovys nūvoda īdzeivuotuoji. Kūpeigi tyka izrūtuota svātku egle ar apmaklātuoju leidza pajimtajim rūtuojumim. Par vīnu nu humoristiskuokajim rūtuojumim tyka atzeits Ontona lūmys atveiduotuoja Imanta Slišāna atnastais pižiks.

Kab atsabreivuotu nu vysa švakuo aizvadeitajā godā, pasuokuma apmaklātuoji vysu nagativū satyna dzejis komulī i īmete guņskurā, kab vyss švakais pagaistu. Teatra grupys „Palādas” veirīšim tyka uzticāts svareigs aizdavums – viļkt bluči apleik vysa parka teritorejai, savuocūt blučī vysys likstys i nalaimis i piečuok tuos sadadzynojūt guņskurā.

Zīmyssvātku egleitis īdegšonys pasuokums beja pyrmais lelais pasuokums jaunizveiduotajā Ontona i Annes parkā. Parka izveide uzsuokta pasasokūt Borisa i Inārys Teterevu fondam 2014.goda 1.jūlī. Kūpejuos projekta izmoksys sastuoda 7065,15 EUR, no kurom 89 % atbaļstejs Borisa i Inārys Teterevu fonds.

 

Viesti sagataveja: LaKuGa piec pasuokuma organizatoru snīgtuos informacejis

??????????????????????

Print Friendly, PDF & Email