18. janvarī nūtyka Ontona dīnys puorguojīņs “Raibī panti”, Upīte – Stabļova – Dubļova – Brieksīne. Dīvamžāl leits pasaryupēja, kab īplānuotais puorguojīņs ar slēpem puorsavārstu par puorguojīni ar kuojom, kas ari nabeja tik nalabi, partū ka variejom izīt i izskrīt Ontona Slišāna bierneibys stygys.

Puorguojīņs itaidā maršrutā tyka izvālāts, partū ka Upīte beja Ontona Slišāna dzeivis rodūšuo vīta, Stabļova – pīdzimšonys i bierneibys vīta, Dubļova – daudzu stygu vīta, kas dzeivis laikā izstaiguotys, nu Brieksīne – Ontona atdusys vīta. Puorguojīņa nūsaukums “Raibī panti” – tai dzejnīks nūsauce sovu pyrmū gruomotu, kas izguoja 1991. godā.

Puorguojīņs īsasuoce Upītē pi Ontona Slišāna Upītes Kulturviesturis muzeja. Tuoļuok caur Stabļovys cīmu, kur apsavērem Ontona dzymtū sātu i pierteņu, kurā jis dzims, tuoļuok beja Dubļovys cīms i beiguos tykom Brieksīnis kopūs. Tī Ontonam nūdzīduom divejis dzīsmis, kurom vuordi ir atrūnami Ontona pyrmajā dzejis kruojumā “Raibī panti”, īdadzynuom sveceitis, kūpeigi puorskaitejom gruomotu “Raibī panti”, pasarunuom par i ar Ontonu, īdzērem līpzīdu čaju i guojem atpakaļ iz sātu.

Prīca par tim, kas nanūsabeida nu laikapstuokļu i izbaudeja puorguojīņa goreigū vierteibu.

Teksts: Upītes Tautys noma vadeituojs Andris Slišāns