Gūdynojūt fotografa Juoņa Gleizda pīmiņu, Rēzeknis nūvoda pošvaļdeiba sadarbeibā ar Latgolys fotografu bīdreibu itūgod reikoj vairuokus pasuokumus, kurūs pīsadaleit aicynuoti vysi fotografejis entuziasti i muokslinīki.

Nu 22. da 24. maja Rēzeknis nūvoda Nautrānu i Iļžukolna pogosta teritorejā nūtiks fotografiešonys svātki aba foto pleners. Vysi grybātuoji teik aicynuoti dasaceit da 31. marta, syutūt dasacejumu iz e-postu lauraplus@inbox.lv voi zvonūt Igoram Pličam (29121689). Lobuokī plenera laikā radeitī dorbi tiks duovuoti Rēzeknis nūvodam (kotrs autors atlaseišonai varēs īsnīgt 5 dorbus), kuru izdruku finansēs pošvaļdeiba i paturēs tīseibys jūs izmontuot. Taipat lobuokūs dorbus apbolvuos i Rēzeknis nūvods, i pogostu puorvaļdis.

Plenera laikā paradzātys ari lekcejis i diskusejis par fotomuokslu i tehniku. Aicynuoti dasasaceit ari lektori, kas varātu daleitīs sovā pīredzē par temom “Kas ir loba fotografeja?”, “Ainova”, “Portrets” i “Žanra aba sadzeivis fotografeja”.

12. septembrī Juoņa Gleizda dzymtajā vītā Vacgailumūs nūtiks J. Gleizda pīminis akmiņa atkluošonys svātki, kai ari Nautrānu sporta hallē – kulturys nomā tiks reikuota plenera dorbu izstuode. Paradzāts, ka piec tam tei varātu byut ari ceļojūša.