1. majā nu 10.00 da 15.00 Rēzeknis Kulturys i atpyutys parkā (Raiņa īlā 29a) nūtiks nu jau tradicionalais pavasara godatiergs “Rasādu opluots”, kur sevkurs varēs atrast i īsaguoduot sovam duorzam Latgolā audzātus stuodus.

Godatiergā byus stuodu audzietuoji nu Latgolys, pīduovojūt īsaguoduot sovam duorzam i dekorativūs kryumus, veitiņaugus i skujeņus, i vīngadeigūs i daudzgadeigūs zīdu stuodus. Taipat apmaklātuojus ar daudzveideigu pīduovuojumu īprīcynuos omotnīki i daiļomota meistari, maizis cepieji, sīra siejieji, bitinīki, soldonumu i lauku lobumu gataveituoji i tierguotuoji.

Kab īsapierkšona byutu ļusteiguoka, nu 11.00 Kulturys i atpyutys parka estradē paraleli ritēs dzīšmu i deju koncerts, kurymā uzastuos pošvaļdeibys agenturys “RKTC” bārnu deju kolektivs “Dziguči” (vad. Gunta Sidorova), Rēzeknis vidiejuos paaudzis deju kūpa “Vadži” (vad. Inga Peļņa), Veremu pog. vidiejuos paaudzis deju kolektivs “Kūzuls” (vad. Vineta Āboliņa), Rēzeknis senioru deju kolektivs “Zelta atvasara”(vad. Olga Deksne).

Ar pavasareigom dzīsmem parku īskandynuos Rēzeknis folklorys kūpa “Rūta” (vad. Madara Broliša), sīvīšu pūļu kors “Jutrzenka” (vad. Irena Ivanova), senioru kors “Septiņkalne” (vad. Iveta Kepule), krīvu folklorys kors “Ivuški” (vad. Jeļena Burova), krīvu muzykys ansamblis “Harmonija” (vad. Olga Gaile), kazaku dzīšmu ansamblis “Debesszils zieds” (vad. Tatjana Rasčosova), ukraiņu vokalais ansamblis “Vodograj” (vad. Tatjana Orlova) i boltkrīvu vokalais ansamblis “Suzorje” (vad. Ludmila Pikaleva).

Skateituojus īprīcynuos arī eipašī gosti nu Pūlejis – Sejni piļsātys guņsdziesieju pyutieju orkestris (vad. Juzefs Žukovskis), nu koncertu vadeis tautā īmīļuotī muziki, Latvejis šlāgeraptaujis veterani – duets Inga i Normunds.

Īīšona godatiergā i koncertā bez moksys.