Bazneicu naktī byus vareiba īpazeit ari Latgolys dīvnomus

5. juņa vokorā nu 18.00 jau ūtrū godu nūtiks Bazneicu nakts, kurā cylvāki teik aicynuoti īpazeit Latvejis bazneicu i klūsteru kulturys i goreigū montuojumu. Itūgod nūtikšonā pīsadaleis 136 Latvejis bazneicys, ari 15 Latgolys dīvnomi. Izzynuot, kurys bazneicys pīsadaleis pasuokumā, var sātys lopā baznicunakts.lv, kur atrūnamys nūvodu interaktivuos kartis.

Bazneicu nakts programa ari itūgod veiduota kai vareiba īpazeit tradicionalūs kristeigūs konfeseju – luterāņu, katuoļu, baptistu, adventistu, metodistu, pareizticeigūs i vacticeibnīku – bazneicu goreigū i kulturys montuojumu. Bazneicuos nūtiks koncerti, ekskursejis, pasuokumi bārnim i laiks aizlyugumim i apcerei klusumā.

Latgola pasuokumā byus puorstuovāta ar 15 bazneicom: Bolvu Vyssvātuos Treisvīneibys katuoļu bazneicu, Augustovys Sv. Elizabetis katuoļu bazneicu, Baļtinovys Kunga Jezus Kristus Pasludynuošonys katuoļu bazneicu, Viļakys Jezus Sirds katuoļu bazneicu, Škilbānu Suopu Dīvmuotis Rūmys katuoļu bazneicu, Malnovys Rūžukrūņa Dīvmuotis katuoļu bazneicu, Mežavydu skapulara Dīvmuotis Rūmys katuoļu bazneicu, Saļņovys Sv. Juoņa Tuksnesī saucieja bolsa katuoļu bazneicu, Kampišku vacticeibnīku lyugšonu nomu, Feimaņu Sv. Juoņa Kristeituoja katuoļu bazneicu, Juosmuižys Svātuo Krysta pagūdynuošonys katuoļu bazneicu, Nīdermuižys Kunga Jezus Apskaidruošonys katuoļu bazneicu, Aglyunys baziliku, Daugovpiļs Svātuo Pītera kēdēs katuoļu bazneicu, Ludzys Jaunovys Marijis dabasūs uzjimšonys katuoļu bazneicu.

Vaira par pasuokuma programu varēs izzynuot majā sātys lopā baznicunakts.lv.

Print Friendly, PDF & Email