Dagdys nūvoda goda leluokī svātki “Annas Dagdā” ir nūsaslāguši. Vairuoku dīnu garumā sevkurs varēja atrast sev teikamu pasuokumu.

22. julī svātki suocēs ar velomaratonu “Apkārt Ežezeram”. 33 velomeili izbrauce 31 km garu maršrutu – Dagda – Ezernīki – Tolstovkys kolns – Piloru ūzulu audze – ceļš iz Andzelim – Andzeli – Kondraši – Murāni – Artjomovka – Purpli – Dagdys piļskolns – Dagda. Tuos dīnys vokorā Dagdys Tautys nomā puļciejuos nūvoda pogostu ļauds iz dzīšmu karim “Novads dzied!”. Nasaverūt iz tū, ka daudzi dzīduotuoji pyrmū reizi kuope iz skotuvis, pogostu koru grupys puorsteidze skateituojus ar sovom dzīsmem, izpiļdejumu, tārpim i šovu.

Ūtrajā svātku dīnā 45 cylvāki devēs ekskursejā “Aplis pa Dagdas novadu”, kurys laikā apmeklēja Kroma kolnu, muzeju “Ondrupinis lauku sāta”, Jaundūmis vidis izgleiteibys centru i ekspoziceju zalu, Svareņu nūvodpietnīceibys ustobu, “Kundalini jogu” Bierzeņu Tautys nomā i Vidis izgleiteibys i kulturys centru “Ķepa”. Jelgovys īlys atpyutys vītā pi Dagdys azara nūtyka pludmalis volejbola turnirs, Svareņu nūvodpietnīceibys ustobā nūtyka akceja “Nakts muzejā” i vālu vokorā JIC “Parka rozes” sasaceņte strītbola spālātuoji.

24. julī, pīktdīnē, nūtyka tradicionalais Annys dīnu godatiergs, kura laikā nūvoda pogostu ļauds izapaude ar sovom rodūšajom idejom. Kotra pogosta teltī varēja koč kū nūgaršuot, apsavērt, aptausteit i pat paspielēt. Tikom cyti vyzynuojuos zyrgu aizjiugā. Tī, kas gribēja, varēja izbraukt lelu apli pa piļsātu ar vairuokom pīturom, kuruos jaunīši izspēlēja vysaidys legendys par Dagdu. Svātki turpynuojuos ar folklorys kūpu uzvadumu “Kod saimineicys gostus gaida”, kura laikā varēja vuiceitīs neit svīkstu, vuoreit sīru, gatavēt cytus gordumus i piec tam tūs nūgaršuot. Piecpušdīnē sovus spākus i iztureibu puorbaudeja Iztureibys skriejīņa dalinīki. Trase beja tik sarežgeita, ka na vysim beja pa spākam, i finišu varēja sasnīgt tik ar cytu dalinīku paleidzeibu. Dīnys nūslāgumā nūtyka gostu muokslinīku koncerts, kurā uzastuoj grupa “Otra Puse” i dzīduotuoja Antra Stafecka.

Sastdīne suocēs ar zyrgu rykšuotuoju saceņseibom. Skateituoji varēja baudeit na tik azartiskuos saceņseibys, nu ari apsavērt i sameiļuot vysaidus dzeivinīkus – kozys, gūvs, ponijus, trušus i pundurviersi. Muokslinīciskuos pošdarbeibys kolektivu prīšknasumus varēja redzēt koncertā pi Veseleibys i socialūs pakolpuojumu centra “Dagda”. Svātku kulminaceja – nūslāguma koncerts – puļcēja daudz skateituoju. Iz skotuvis kuope i vītiejī pošdarbeibys kolektivi, i gosti nu Kruoslovys i Daugovpiļs nūvodu, i nu Visaginys (Lītova). Lelu prīcu saguoduoja pyrmsškolys izgleiteibys īstuodis “Saulīte” bārnu prīšknasums. Vysu estradi aizpiļdeja daudzī deju kolektivi, izdoncojūt deju rokstus, i vokalī ansambli ar skaneigajim bolsim.