Nu 25. da 30. augusta Uzbekistanā nūtiks storptautisks muzykys festivals “Sharq taronalari”, kas puļcēs dalinīkus nu vaira kai 50 vaļstu, tymā skaitā ASV, Alžīrejis, Austrejis, Bangladešys, Beļgejis, Kostarykys, Iranys, Japanys, Nepalys, Krīvejis i cytom. Tys ir leluokais Centraluos Āzejis X jubileja festivals i Latveju tymā puorstuovēs 2 grupys – “Laimas Muzykanti” i “Iļģi”.

Kai stuosta grupys “Laimas Muzykanti” līders Artūrs Uškāns: “Ar divejom grupom itymā festivalā teik puorstuovātys tik 3 vaļsts – Latveja, Kīna i Krīveja. Tai nu izguoja, ka myus iz itū pasuokumu īlyudze Uzbekistanys viestnīks Latvejā, nu “Iļģus” – Latvejis viestnīks Uzbekistanā. Dūmoju, tei vys nav klaida, ka Latveja ir pīskaiteita pasauļa lelvaļstim – koč i teritoreja mums nav lela, folklorys jūmā mes patīsai asam lelvaļsts.”

Grupa “Iļģi” ir postfolklorys aizsuocieji Latvejā, sovukuort “Laimas Muzykanti” jau divdesmit godu ir puorlīcynūši etnorokeri. Voi obeju grupu storpā volda konkureņce? Ilgas Reiznīce uzsver, ka “absoluti nav nikaidys konkureņcis, taišni ūtraiž – prīca, ka Latveju puorstuovam kūpā. Patīseibā jau itū konkursu uztveram kai festivalu, na ceiņu par bolvom”.