19. janvarī 17.30 Latgolys Centraluos bibliotekys pasuokumu telpā nūtiks Helenys Laurinovičys-Pronevskys gruomotys “Grymstušōs saleņas” prezentacejis pasuokums, informej golvonuo bibliotekare Inga Gedžūne. Gruomotu 2015. goda beiguos izdavuse Daugovpiļs Latgalīšu bīdreiba ar Daugovpiļs piļsātys i nūvoda dūmis finansialu atbolstu.

Latgalīšu autore i sabīdryskuo darbineica Helena Laurinoviča-Pronevska (1898-1969) dzymuse i auguse Leiksnys pogosta Jaunušānu cīmā. Vuicejusēs Pīterburgys sīvīšu gimnazejā, studējuse Jekaterinodarys augstškolā. 1920. godā atsagrīzuse dzimtinē, īsastuojuse Latvejis Universitatē, dorbuojusēs Latgolys studentu sabīdryskajuos organizacejuos. Piec apsapreciešonys ar Jezupu Laurinoviču puorsacāluse iz Rēzekni. 1944. godā atraitnēs palykušuo Helena kūpā ar dālim devēs emigracejā. 1950. godā tyka Kalifornejā, kur paraleli maizis dorbam suoce nūsadorbuot ar rakstnīceibu i gleznīceibys studejom.

Trymdys periodiskajūs izdavumūs publicāta Helenys Laurinovičys-Pronevskys eisproza i dzeja latgalīšu volūdā. Juos literaruo montuojuma centrā ir diveji autobiografiski romani – “Grymstušōs saleņas” (1964) i “Pasauļs līsmōs” (1981). Itī atmiņu tāluojumi ir vierteigs latgalīšu volūdys i kulturviesturis pīmineklis par Latgolys zemnīku dzeivi Leiksnys pogostā 20. godu symta suokuos, par tī dzeivojūšim cylvākim i dzymtom.

Romana “Grymstušōs saleņas” jaunū izdavumu papyldynoj Helenys Laurinovičys-Pronevskys da šam napublicāti dzejūli, kai ari latgalīšu gruomotizdevieja Vladislava Luoča i viesturneicu Beātys Krajevskys i Felicejis Sardiko veļtejumi autoris pīmiņai.