1. majā nu 10.00 da 15.00 Rēzeknis Kulturys i atpyutys parkā (Raiņa īlā 29a) vysi tiks gaideiti tradicionalajā pavasara godatiergā “Rasādu opluots 2016”, kab saryupātu jaunus stuodus sovam duorzam, prīcuotūs par pavasari i svieteitu pareizticeigūs i staraveru Leldīni, informej Rēzeknis Kulturys i Turisma centra puorstuove Maija Upeniece. 

Kā īrosts, nu 10.00 tierga placī varēs īsaguoduot i Latgolys stuodu audzātuoju pīduovuotūs vīngadeigūs i daudzgadeigūs zīdu stuodus, dekorativūs kryumus, veitiņaugus i skujiņus, i sātys ražuotuoju lauku lobumus – sīru, maizi, madu i cytus gordumus, kai ari daiļomota meistaru darynuojumus.

Svātku reits 10.00 suoksīs ar pyušamūs instrumentu orkestra “Rēzekne” (vad. Sergejs Sergejevs) muziciešonu. Orkestris apreļa suokuos svieteja 25 godu jubileju i otkon duovuos klauseituojim vareibu izbaudeit breineigū muziku snāgumu.

Cikom tierguotuoji i piercieji sovstarpeigai “kaulēsīs”, tikom 10.30 Jurs Vucāns tiergā bryuti vaicuos, jam paleidzēs Iveta Graudiņa, nu muzykali atbaļsteis i īdrūsynuos Rēzeknis amatīrkolektivu dalinīki. Uzastuos Rēzeknis kapela “Dziga” i videjuos paaudzis deju kolektivs “Dziga”, folklorys kūpa “Rūta” (vad. Madara Broliša), pošvaļdeibys agenturys RKTC bārnu deju kolektivs “Dziguči” (vad. Gunta Sidorova), sīvīšu pūļu kora “Jutrzenka” solo grupa (vad. Irena Ivanova), krīvu folklorys kors “Ivuški” i krīvu folklorys bārnu ansamblis “Zdravinka” (vad. Jelena Burova), kazaku dzīšmu ansamblis “Debesszils zieds” (vad. Tatjana Rasčosova) i ukraiņu vokalais ansamblis “Vodograj” (vad. Tatjana Orlova).

Kod “bryute byus atrosta”, tod 12.00 muzicēs šlagermuzykys grupa “Liepavots” nu Jākubpiļs i byus eistuo šaļts uzdoncuot pavasara valšus.

Īīšona “Rasādu opluotā” bez moksys.

Informaceja tiergoutuojim i dasasaceišona da 25. apreļa, zvonūt 26332249 (Gunta Grabuste).