Nūtiks storptautyskais teatra festivals “Telpa – Daugavpils”

Nūtiks storptautyskais teatra festivals “Telpa – Daugavpils”

10. i 11. junī Daugovpilī nūtiks storptautyskais teatra festivals “Telpa – Daugavpils”, kas nu 2013. goda ir nūzeimeiga Daugovpiļs teatra tradiceja, informej teatra sabīdryskūs attīceibu vadeituoja Janīna Ivanova. Festivals “Telpa – Daugavpils” kolpoj par unikalu vareibu jaunim teatra muokslinīkim izapaust breivā i rodūšā atmosferā, īpyušūt eksperimentala teatra elpu piļsātys telpā.

Juoatzeimoj, ka, pasasokūt itam festivalam, Daugovpiļs teatram ir izaveiduojuse veiksmeiga sadarbeiba ar režisorem Lucinu Sosnovsku i Paulu Pļavnieci. Piec daleibys festivalā obejis muokslineicys teatrī īstudiejušys taidys izruodis kai “Pie mums viss kārtībā”, “Hamlets”, “Svešie svētki”, “Šinelis un Šinelis”. Itūgod festivala ītvorūs 10 jaunī muokslinīki nu Latvejis, Lītovys, Krīvejis, Boltkrīvejis, Norvegejis i Spānejis veiduos 5 performaņcis, kurymos pīsadaleis Daugovpiļs teatra akteri i DDMV “Saules skola” programys “Teātra māksla” audziekni.

10. junī Daugovpiļs cītūksnī varēs apsavērt četrys performaņcis. Atškireibā nu cytu godu performaņcis nūtiks vysaiduos Daugovpiļs cītūkšņa lokacejis vītuos. 18.30 skateituoji aicynuoti sasapuļcēt pi Marka Rotko muokslys centra īejis, pasuokuma suokys 19.00. Pasuokums ilgs 2 stuņdis. Īīšona – 0,99 eiro.

Pīktuo performaņce nūtiks 11. junī 11.00 Daugovpiļs Vīneibys laukumā. Performaņci veiduos muokslineica nu Spānejis, i tei nūtiks kravys mašynā. Sovukuort festivala nūslāgumā varēs redzēt izruodi “Mana pils – Daugavpils” DDMV “Saules skola” programys “Teātra māksla” audziekņu izpiļdejumā. Izruode nūtiks Daugovpiļs teatrī 13.00. Īīšona – 0,99 eiro.

Beletus varēs īsaguoduot Daugovpiļs teatra kasē (654 26520) i škārsteiklā. Festivalu organizej Daugovpiļs teatris, festivala muokslinīcyskais vadeituojs – režisors Georgijs Surkovs.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]