13. augustā nu 20.00 da 4.00 Baļtinovā jau 21. reizi nūtiks muzykys festivals Osvalds.

Jau 20 godu Baļtinovys nūvoda vuords ir nasaraunamai saisteits ar muzykys festivala Osvalds vuordu. Suokumā tys beja nalels muzykantu saīts, nu ar laiku palyka par īvāruojamu muzykys nūtikšonu Latgolā. Prūtams, kotrys laiks īnas sovys korekcejis, nu golvonuos Osvalda pamatvierteibys – energiskums i dzeivisprīca palīk namaineigys.

Itūgod tuos paleidzēs nūdrūsynuot ari tikpat pozitivi muokslinīki, kas ļaus padareit Osvalda nakti Baļtinovā par naaizmierstamu emoceju pylnu nūtikšonu. Apmaklātuojus prīcynuos šarmantais šlageru i popmuzykys izpiļdeituojs Normunds Rutulis. Vacuokim ļaudim nūteikti byus pateikama sasatikšona ar jauneibys dīnu alku Žoržu Siksnu. Sovukuort pasauļa popmuzykys jutūnē īvess Kristīne Šomase. Latgolys muokslinīkus puorstuovēs Andris Baltacis ar grupu “Baltie Lāči”, kai ari vītejuo grupa nu Upeitis “Unknown Artist”. Juosoka, ka itei grupa byus sagatavejuse specialu programu ar viņgod tragiski aizguojušuo Osvalda himnys autora Juoņa Keiša dzīsmem. Vēļ nu Bolvu pusis vītejūs muzykantu iz skotuvis kuops nabiedneigi pozitivuo instrumentaluos muzykys grupa “Alu Cilvēki”, kas itamā reizē byus īstudējuse vairuokys dzīsmis ari kūpā ar solisti Dagmāru Laicāni. Kai ari apmaklātuojus gaida sasatikšona ar, nu jau juosoka, latvīšu šlagermuzykys ikonu duetu “Sandra”, nu vysu tū kūpā sasaisteis popularuo TV raidejuma “Latvijas šlāgeraptauja” vadeituojs, akters Guntis Skrastiņš. Sovukuort jaunīšu auditoreju īprīcynuos muzykaluo apvīneiba “Olas” ar sovim gruoviejim par myusu dīnu aktualitatem, grupa “Tranzīts”, kas nu jau latvīšu muzykā ir namaineiga vierteiba, kai ari Dj Japānis, Dj Barik, Dj Mairix i Dj Civix.

Kab padareitu daudzveideiguokys Osvalda nakts nūtikšonys, byus vareiba baudeit ari vysaidys ar muzyku nasaisteitys lītys. Tradicionali apmaklātuojim byus vareiba “izasaut” ar katapultu 20 m augstumā. Taipat varēs pīsadaleit loterejā ar īīšonys beletim i laimēt vysaidys vierteigys bolvys nu “Philips”. Nu eipašu puorsteigumu byus sagatavejs guņs muokslinīks Alesh Walker, kas pīduovuos īspaideigu pušnakts guņs šovu.

Īīšonys moksa īprīkšpuordūšonā 6 eiro, iz vītys 10 eiro. Beletus var īsaguoduot bilesuparadize.lv  voi  Bolvu Kulturys i atpyutys centrā.