10. aprelī Reigā nūteikūšajā storptautiskajā seminarā “Jaunie valodas lietotāji Latvijā: valodu izglītības politika integrācijai un saliedētībai” runuos par latgalīšu volūdu, i tū, kas motivej tū apgiut.

Seminara mierkis ir informēt i diskutēt par vaicuojumim, kas jaunajim volūdys lītuotuojim aktuali volūdys apgivē myusu dīnuos Latvejā. Kai ari apsavērt itū vaicuojumu cytu Eiropys vaļstu pīredzis kontekstā.

Jiedzīņs new speakers (angļu vol.) aba jaunī volūdys lītuotuoji myusu dīnu sociolingvistiskajūs pietejumūs teik attīcynuots gon iz imigrantim, kuri suok apgiut vīteju pamatnaceju volūdu, gon iz tradicionalū minoritašu puorstuovjim, kuri turpynoj vuiceitīs vaļsts volūdu(-ys), gon ari iz regionalū volūdu ci dialektu puorstuovjim, kuri, nūteiktu īmaslu vadeiti, ir nūlāmušs apgiut tū ci cytu volūdys variantu.

Par Latvejis pīredzi integracejā i vaļsts volūdys apgivē stuosteis Latvīšu volūdys agenturys puorstuovji. Taipoš tiks runuots par mozuokumtauteibu pīredzi latvīšu volūdys apgivē.

Par motivaceju latgalīšu volūdys apgivē i bīdreibys “Latgolys Studentu centrs” pīredzi latgalīšu rokstu volūdys nūdarbeibu organiziešonā stuosteis lakugys projekta vadeituoje Vineta Vilcāne.

Ar sovu pīredzi daleisī Tilburgys Universitatis (Nīderlande) i Edinburgys Universitatis (Skoteja) puorstuovji.

Storptautiskū seminaru organizej Rēzeknis Tehnologeju akademeja, DAAD Informacejis centrs Reigā i Latvejis Universitate, Latvīšu volūdys agentura.

Seminars nūtiks 10. aprelī, ES sātā, Aspazejis bulvarī 28, 2. stuova Kaminzalā. Apmeklēt seminaru var sevkurs interesents. Daleiba seminarā bezmoksys. Programa.

Drukavuot