Normunds Liepiņš, kurs vaira zynoms kai Latvejis šlāgermuzykā popularuo dueta “Inga un Normunds” dalinīks, pīduovoj video dzīsmei “Sapynā nūbeju”.

Duets “Inga un Normunds” muzykys jūmā dorbojās jau 17 godu i ir izdevs 10 albumus, gondreiž kotrā Normundam ir ari kaida solodzīsme. Dzīsme “Sapynā nūbeju” ir īkļauta dueta jaunuokajā latgalīšu dzīšmu albumā “Munai Latgolai”. Normunds stuosta, ka, struodojūt studejā pi dzīsmis īroksta, golarezultats saguojs lobuoks kai suokumā dūmuots. Dzīsmē atsakluoj pavysam jaunys, sovpateigys Normunda bolsa tembra nūkruosys i ari temperaments. Tai kai dzīsmei ir jautrys raksturs, nu taidys dzīsmis parosti ir eisys i nareši klauseituojim pasleid garum napamaneitys, Normunds nūsprīde tai pīškiert spūdruokys kruosys i izveiduot videoklipu.

Dzīsmis muzykys autors ir dzīsminīks Vinsents Kūkuojs, vuordu autors – dzejnīks Pīters Jurciņš. Videoklipa autori ir Latgolys entuziastu grupa “Biļdis” i ari pats Normunds. Par dzīsmis video veiduošonu Normunds pats soka: “Gribieju itai dzīsmei dūt ūtrū elpu, paruodeit tū dziļuok nakai dzīsme spiej tik ar audio skaniejumu. Tai kai dzīsmis saturs ir saisteits ar sapynim, kū varam nūsapynuot, tod tys deve vēļ papyldu idejis tam, kai veiduot klipa scenareju. Dzīsmis tekstā ir cīši daudz humora, partū grybu caur vizualū interpretaceju tū vēļ vaira paspylgtynuot. Cīši grybu, lai itaidā veidā dzīsme nas leluokā izplatejumā latgalīšu volūdys skaistumu i skaneigumu.”