Kū var dareit i apsavērt Rāznys Ceļuotuoju dīnā?

Kū var dareit i apsavērt Rāznys Ceļuotuoju dīnā?

14. julī nūtiks Rāznys Nacionaluo parka Ceļuotuoju dīna, kurys laikā byus īspiejis pīsadaleit vysaiduos aktivitatēs Rēzeknis nūvoda Čornajis, Kaunatys, Muokūņkolna, Lūznovys pogostūs i Dagdys nūvoda Ezernīku i Ondrupenis pogostūs. Aktivuos atpyutys cīneituoji vareis īsasaisteit ari kaidā nu trejim puorguojīnim.

Rēzeknis nūvods

Čornajas pogostā nu plkst. 13.00 leidz 17.00 byus īspieja bez moksys izbraukt ar buru laivu “Sea Esta”

Kaunatys pogostā atpyutys vītā “Skaistā Rāzna” vareis īsapazeit ar zivu kiupynuošonys procesu, bet bišu muižā “Upeslāči” byus īspieja pošam izlīt sovu voska sveci, sataiseit mada kuori voi izsvīst madu. Zemnīku saimisteiba “Rudo kumeļu pauguri” nu plkst. 12.00 leidz 18.00 organizēs izbraucīņus zyrgu pajiugūs gar Rāznys azara lamašu pīkrasti. Keramikis Evalds Vasilevskis pīduovoj radūšū darbneicu “Nospiedumi mālā”, bet gitaru darbneicā zemnīku saimisteibā “Tiptops” vareis apgiut šyupuļteiklu darynuošonu. Sovukuort Kaunatys kandžys muzejs sovim apmaklātuojim pīduovoj spēli “Uzmini melodiju!”.

Muokūņkolna pogostā Dobys izgleiteibys centrā “Rāzna” vareis apsavērt Ezernīku pogosta rūkdarbneicys, Latvejis Naredzeigūs bīdreibys dalineicys Tamārys Dorofejevys krystadyurīnī i bisera tehnikā darynuotūs glaznu izstuodi, kai ari pīsadaleit orienteišonuos spēlē.  Bejušajā Muokūņkolna pamatškolā nūtiks Evitys Kairišys radūšuos darbneicys “Viens un divi, gatavs!”, kurys laikā vareis īsaguoduot rūkdorbus. Byus ari  Ludmilys Merkulovys zvaneņu privatkolekcejis izstuode. Sovukuort “Itkačūs” varēs na viņ apsavērt dažaidu šķirņu trušus i ēst blīnus (par moksu), bet ari pīsadaleit suveniru izgatavuošonys meistarklasēs.

Tim, kas nagrib braukt da pošai Rāznai, byus īspieja braukt iz Lūznovys muižu. Nu plkst. 12.00 leidz 14.00 bez moksys vareis izstaiguot Lūznovys muižu i vāluok ari īsasaisteit grafikys darbneicā.

Dagdys nūvods

Ezernīku pogostā varēs izbraukt ar kuteri voi SUP dieli pa Ežazaru (gostu sāta “Saullēkti ezeros”) i paēst muižkunga zivu zupu voi kruasanu (Jaundūmis muižys vidis izgleiteibys centrs).

Ondrupenis pogostā ceļuotuoji breivdīnu sātā “Runčuki” aicynuoti pīsadaleit muola veiduošonys darbneicā i īsasaisteit vysaiduos spēlēs i aktivitatēs. Muzejs “Ondrupenis lauku sāta” plkst. 13.00 pīduovoj meistarklasi pierts slūtu sīšonā. Sovukuort Nīdru jumtu darbneicā vareis apgiut pamatprasmis kūka karūšu grebšonā. Ceļuotuoju dīnā sevkurs ir aicynuots apmeklēt ari Kroma kolnu.

Puorguojīni

Plkst. 10.00 suoksīs velopuorguojīņs apleik Ežazaram. Tuo kūpgarums ir 45 kilometri. Maršruts ir taids: Dagda – Jaundūmis muiža – Ezernīki – Piļuori – Andzeli – Ondrupene – Dagda.

Ja nav spāka tik garam velopuorguojīņam, tod var dūtīs 8 km puorguojīnī Lipuški – Jaunstašuli – Dvarči  – Lipuški nūjuotuojim i kuojuomguojiejim.

Ir ari īspieja plkst. 11.00 i 13.30 kūpā ar kulturakmiņu pietneicu Liliju Jakubenoku dūtīs pa Akmiņu taku.

Ir padūmuots ari par transportu

Ceļuotuoju dīnā storp pasuokuma nūrisis vītom kursēs bezmoksys autobuss “Rēzekne – Strodi – Batni – Kaunata – Pilori – Novomisli – Rēzekne”:
9.00 Izbraukšona nu stuovvlaukuma pi veikala RIMI, Goldnīku īlā 8, Rēzekne;
9.30 Atpyutys vīta “Skaistā Rāzna”. Kyupynuotu Rāznys azara zivu degustaceja;
10.30 Bišu muiža. Ekspoziceja, biškūpeibys produkcejis īguode, radūšuos darbneicys;
11.30 Kandžys muzejs. Ekspoziceja, degustaceja;
13.00 “Saullēkti ozolos”. Izbraucīni pa Ežazaru, atpyuta Piļuoru ūzulu audzē;
15.30 Jaundūmis muižys vidis izgleiteibys centrs. Ekspoziceja, muižkunga zivu zupa i kruasani;
17.00 Paradzamais atsagrīzšonys laiks Rēzeknē.

NB! Autobusam vajadzeiga īprīkšeja pīsasaceišona.

Vaira informacejis par Rāznys Nacionaluo parka Ceļuotuoju dīnu ite.

Karteitei ir ilustrativa nūzeime: momenti.lv.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]