Paziņuoti projektu konkursa “Reģionālo un vietējo mediju atbalsta programma” apakšprogramys “Atbalsts sabiedriski nozīmīgas žurnālistikas radīšanai medijos Latgales plānošanas reģionā” rezultati. Kūpumā atbaļsteiti septeni projekti, storp tim ari “Latgalīšu kulturys ziņu portals lakuga.lv”.

Valsts regionaluos atteisteibys agenturys sātys lopā nūruodeits, ka atbaļsteitūs projektu pīteicieji ir: “5 labas ziņas, Biedrība „Latgolys entuziastu grupa „Biļdis””, Dautkom, Vietējā Latgales Avīze; Vaduguns; Kultūras iniciatīvu un realizācijas apvienība, lakuga.lv”.

Apakšprogramys “Atbalsts sabiedriski nozīmīgas žurnālistikas radīšanai medijos Latgales plānošanas reģionā” ītvorūs projektu īsnāgumus tyka aicynuoti pīsaceit presis izdavumi, elektroniskī plošsazinis leidzekli, interneta vītnis, kai ari naatkareigī producenti, bīdreibys i nūdybynuojumi, kas veidoj redakcionali naatkareigu žurnalistikys saturu. Pretendentu pamata mierķauditorejai ir juoatsarūn Latgolys planavuošonys regiona teritorejā. Itymā apakšprogramā pīejamais finansiejums ir 142 500 eiro.

“Asam gandareiti par sajimtū atbolstu, tam ir izškirūša lūma lakuga.lv tuoluokajā pastuoviešonā,” soka portala lakuga.lv redaktore Vineta Vilcāne. Projekta ītvorūs planavuots portala saturu padareit saistūšuoku i daudzveideiguoku. Rudinī lakuga.lv gaidoma ari jauna sātys lopa, kura teik veiduota ar Latvejis vaļsts mežu i Vaļsts kulturkapitala fonda atbalsteituos Latgolys kulturys programys 2018 atbolstu.