Roksta autors: portals lakuga.lv

Kod leidz Latvejis symts godu jubilejam paliks viņ simts dīnu, vysā Latvejā reikuos večerynkys. Vīna nu taidu večerynku nūtyks ari Viļānūs, Laksteigolu solā. Iz XVIII Tautys muzykantu svātkim 11. i 12. augustā Viļānūs īsarass vaira nakai 150 dalinīku nu 15 Latvejis nūvodu i 45 dalinīki nu Lītovys i Igaunejis.

Itūgod svātkūs pīsadaleis 23 muzykanti – vacmeistari i jaunī muzykanti nu Latgolys i Vydzemis: Pēteris Zeps, Leonards Sarnovičs, Aleksandrs Špundzāns (Viļāni), Irēna Znūteņa (Rēzekne), Pēteris Belinskis (Rēzeknis nūv., Rogovka), Mārtiņš Jurciņš (Rēzeknis nūv., Lendži), Eventijs Zelčs, Aivars Zelčs, Leo Bērziņš, Voldemārs Džigurs (Bolvi), Vitālijs Plešs (Bolvu nūv.,Vactiļža), Pēteris Laganovskis (Baļtinovys nūv., Baļtinova), Verners Dūre (Ruguoju nūv., Ruguoji), Pēteris Jermacāns (Ruguoju nūv., Lozdukolns), Dainis Ločmelis (Kuorsovys nūv., Saļnova), Aleksandrs Boginskis (Daugovpiļs), Leonīds Andžāns, Pēteris Verebs, Antons Rutka (Dagdys nūv., Dagda), Māris Meisters, Lidija Veidemane (Mozsalacys nūv., Sieļi), Teodors Simis, Nikolajs Zaharovs (Reiga) i. c.

Taipat skateituojus i doncuotuojus večerynkā prīcynuos 13 kapelys i muzykantu grupys i nu Latvejis nūvodu, i nu Lītovys i Igaunejis: “Biteitis” (Viļāni, vad. Inga Stafecka), “Bumburneicys” (Viļāni, vad. Vivita Skurule), “Mozī sābreiši” i “Sābri” (Kuorsovys nūv., Saļnova, vad. Elvīra Bleive), “Kramiņi” (Reiga, vad. Nikolajs Zaharovs), “Sēļu muižas muzikanti” (Mozsalacys nūv., Sieļi, vad. Iveta Dukaļska), “Drabešu muižas muzikanti” (Ciesu nūv., Drabeši, vad. Inese Roze), “Mūžam zaļi” (Modūna, vad. Imants Pulkstenis), “Kokle” (Reiga, vad. Dina Liepa), “Spēlmaņi” (Saldus nūv., Neigraņde, vad. Artis Šulbergs), “Ziņģes brāļi” (Bauska, vad. Aigars Urtāns), “Svirbe” (Kauņa, Lītova, vad. Aurelija Bareišienė), “Hanila” (Hanila, Igauneja, vad. Eha Raja, Valvo Valgur).

Pyrmū reizi Tautys muzykantu svātki nūtyka 2001. godā Modūnys rajona Borkovā, nu 2007. goda svātki izskaņ Viļānūs, i tī ir nūzeimeiguokais pasuokums Latvejis nūvodu individualajim muzykantim i muzykantu grupom.

XVIII Tautys muzykantu svātkus reikoj Tautys muzykantu bīdreiba i Viļānu kulturys noms, atbolsta Viļānu nūvoda pošvaļdeiba, Vaļsts kulturkapitala fonds, Gadsimta zaļumballe, moteļs/kopejneica “Pie Kaupra”, Aivars Tauriņš, SIA “Aiva G” i c. sadarbeibys partneri.

XVIII Tautys muzykantu svātku PROGRAMA 2018. goda 11. i 12. augustā

11.augustā
17.00–19.00 XVIII Tautys muzykantu svātku suokuma koncerts
Laksteigolu solā, Viļānūs
19.00–24.00 Latvejis Symtgadis večerynka
Laksteigolu solā, Viļānūs

12.augustā
10.00–11.00 Muziciešona
Viļānu amatnīku tiergā
12.00–14.00 Svātku lelais koncerts
Breivdobys skotive Viļānu tierga placī

Īeja vysūs pasuokumūs – bez moksys