Rokstu sagataveja: portals lakuga.lv

Vosorys golā sovu septeitū studejis albumu “Sudrabs” izdavuse vokaluo grupa “Latvian Voices”, ari itymā albumā īkļaunūt dzīsmis latgaliski, viestej grupys sātyslopā atrūnomuo informaceja. Albumā ir 14 dzīšmu, kurūs vydā latgaliskuos “Kur gaismeņa zyla ausa” i “Kad es guoju tauteņuos”.

Muzykys albuma “Sudrabs” (“sudrabs” latgaliski ir “sudobrys”) topšona aizasuoce vaira nikai pyrma goda, kod grupai roduos ideja par jaunu albumu i koncertrprogramu. Albumā īkļautūs dzīšmu autoris ir “Latvian Voices” dzīduotuojis, bet tuos papyldynoj ari pasaulī i Latvejā zynomu dzīšmu versejis (par pīmāru, “Coldplay”, Seal, “Jauns Mēness” i cytu muziķu dzīsmis). Kai tradiceja ir ari tautysdzīšmu īkļaušona programā, kuruos itūreiz skaņ džeza i popularuos muzykys tūņūs. Dzīsmis latgaliski ir lela grupys repertuara daļa. Jaunuokuo koncertprograma “Sudrabs” ituo goda junī izskanēja ari Latgolys viestnīceibā GORS.

Albums “Sudrabs” īraksteits Reigā, bet tuo produciešonā pīsadalejuši Zvīdrejis a cappella muzykys profesionali. Albums nūpierkams kai CD formatā, tai ari dabojams vysūs popularuokajuos digitaluos muzykys olūtūs.

Vokalajā grupā “Latvian Voices” dzīd sešys dalineicys i vairuoku nu jūs saknis atrūnomys Latgolā, kas ir vīns nu īmesļu repertuarā īkļautom dzīsmem latgaliski, kai ari tam, ka, koncertejūt Latgolā, grupa ar koncerta klauseituojim sasarunoj latgaliski. Golvonuo vainineica pi tuo ir grupys dalineica, komponiste i dzīduotuoja Laura Jēkabsone, kuruos dzymtuo puse ir Bolvu nūvoda Tiļža. Laura soka, ka jaunais grupys albums ir pats lobuokais, kas grupys pastuoviešonys laikā īraksteits.

2019. gods rudinī vokaluo grupa “Latvian Voices” sveiteis darbeibys desmit godu jubileju.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.