Ontona Slišāna 70. jubilejā Upītē svieteis bārnu dzejūļu kūpkruojuma atkluošonu

Ontona Slišāna 70. jubilejā Upītē svieteis bārnu dzejūļu kūpkruojuma atkluošonu

Rokstu sagataveja: portals lakuga.lv

Gatevejūtīs dzejnīka, nūvodpietnīka, publicista i Latgolys sabīdriskuo darbinīka Ontona Slišāna 70 godu jubilejai, Namaterialuos kulturys montuojuma centrs “Upīte” izdevs Ontona Slišāna bārnu dzejūļu kūpkruojumu “Vuss apleik maņ munā volūdā skaņ”. Gruomotys atkluošona tiks svieteita Ontonam Slišānam veļteitajā pīminis pasuokumā Upītis Tautys nomā 28. decembrī, portalam lakuga.lv viesteja Namaterialuos kulturys centra “Upīte” vadeituojs Andris Slišāns.

Latgolys dzejnīks, publicists, nūvodpietnīks i folklorys vuociejs Ontns Slišāns dzims 1948. gods 28. decembrī, niulinejuo Viļeks nūvoda Škilbānu pogosta Stabļovā. Bet 2010. godā rakstnīks aizguoja myužeibā. Sovys dzeivis laikā O. Slišāns īguļdejs nanūviertejamu dorbu Zīmeļlatgolys kulturys i viesturis pieteišonā, kai ari vuocs i pīrakstejs Zīmeļlatgolys folkloru, dybynuojs Upītis i Rekovys etnografiskūs ansambļus. Juo dzejūli izdūti 30 gruomotuos, i vēļ naseņ O. Slišāns beja vīneigais dzejnīks, kurs raksteja i izdeve dzejūļu gruomotys bārnim latgalīšu rokstu volūdā. Ilgus godus Ontons Slišāns vadeja ari Upītis biblioteku, izveiduoja i vadeja Upītis kulturviesturis muzeju, kai ari latgaliskajā kulturvidē īdzeivynuoja iz pasauļa vacuokū latgalīšu meilys aiļu i dzīšmu festivalu “Upītes uobeļduorzs”, bez kura niu septembra mieness Latgolys kulturys dzeivē nav īdūmojams. Niu Ontona Slišāna dorbu turpynoj juo bārni i unuki.

Andris Slišāns potalam lakuga.lv pastuosteja, ka Ontona Slišāna 70. jubilejis atzeimiešona suokusēs jau Ontona dīnys svieteišonā ituo gods janvarī i turpynuosīs leidz 2019. gods 18. janvaram. Tod ari nūsasliegs Ontonam Slišānam veļteitais rodūšūs dorbu konkurss bārnim i pīaugušajim.

28. decembrī Upītis Tautys nomā Ontona Slišāna pīminis pasuokumā tiks prezentāta dzejūļu gruomota “Vuss apleik maņ munā volūdā skaņ”. Kruojumā apkūpuoti bārnim veļteiti dzejūļi nu 15 Ontona Slišāna gruomotu. Andris Slišāns atkluoja, ka pi dzejūļu kruojuma radeišonys struoduojuse vysa saime. Dūma par dzejūļu kruojumu bārnim dzymuse Ontona Slišāna meitai Māreitei, tok muokslinīciskū nūformiejumu radejuši dzejnīka unuki Kate i Domeniks Slišāni.

Gaidūt kruojuma atdareišonys svātkus, Ontona Slišāna saime soka: “Vyss itys gods veļteits Ontona bārnim raksteitajai dzejai, partū ka jis beja vīneigais dzejnīks, kurs raksteja dzeju bārnim latgaliski. Vysa ituo gods aktivitatis “#OntonamSlišānam70” vaira veļteitys bārnim, tok prīškā vēļ daudzi dorba ari pīaugušajim.” Taipat dzejnīka saime nuoruoda, ka Ontona Slišāna bārnu dzejūļu gruomotys niu ir bibliografisks ratums. Tai kai Latgolys školuos aug vajadzeiba piec latgalīšu gruomotu, Slišānu saime ir cīši gondareita par kūpkruojuma “Vuss apleik maņ munā volūdā skaņ” izdūšonu.

Ontona Slišāna 70 godu jubileja svātki Viļeks nūvoda Upītis Tautys nomā nūtiks jau 28. decembrī 16 stuņdēs. Pasuokumā gasteis tyvi i tuoli Ontona Slišāna draugi. Tīpat Upītē vēļ apsaverama ari dzejnīka meitys Annelis Slišānis tekstilmuokslys izstuode “#100dečiLatvijai”.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.

Print Friendly, PDF & Email

Nūtikšonu kalendars