Var pīsadaleit vijūlis spēlis nūmetnē Baļtinovā

Var pīsadaleit vijūlis spēlis nūmetnē Baļtinovā

Rokstu sagataveja: portals lakuga.lv

10.–13. julī nūtiks tradicionaluos vijūlis spēlis vuiceibu nūmetne Baļtinovā. Īdvesmis olūts tai ir ilggadejais tautys muzykants – vijūļnīks Andrejs Rancāns, kuram itūgod palyktu 90 godu. Nūmetnis vuiceibspāki byus tradicionaluos vijūlis spēlis pedagogi i izpiļdeituoji, kurim ir īmanis Latgolys nūvodam soveigā vijūlis spēlis stylā i kuri vuicejušīs itū spēli ari nu Andreja – Asnate Rancāne, Liene Brence, Elīna Reinika i Liene Logina, par gaidomū nūtikšonu informej L. Brence.

Tiks veiduotys div vuiceibu grupys: 1. grupa – repertuara apgivei (daleibnīki ar pamatzynuošonom vijūlis spēlē), 2. grupa – styla izkūpšonai i pylnveiduošonai (daleibnīki ar padzilinuotom  zynuošonom i prasmem vijūlis spēlē). Dasasaceit nūmetnei varams, aizpyldūt anketu i atsyutūt da 5. juļa iz adresi birojs@folklorasbiedriba.lv

Daleibnīka anketa

Daleiba vuiceibu procesā ir bez moksys. Nūdarbeibys tiks organizātys Baļtinovys muzykys i muokslys školā. Daleibnīkim, kurim ir vajadzeigs, pošim juosamoksoj par ādynuošonu i izguldynuošonu. Papyldu par nūmetnis vuiceibu procesu informēs Liene Brence, t. nr. 28602773, e-posts brenceliene@gmail.com

13. julī 18.00 stuņdēs nūtiks Tautys muzykys koncerts, veļteits vijūļnīka A. Rancāna pīmiņai. Koncerts i večerinka piec juo nūtiks dabiskā lauku vidē, A. Rancāna lauku sātā “Mākoņi”. Koncertā pīsadaleis nūmetnis daleibnīki i pedagogi, kai ari tyvuoki i tuoluoki gosti: folklorys kūpys “Grodi” i “Garataka” nu Reigys, Baļtinovys etnografiskais ansamblis i kapela, muzykanti nu Upītis, Saļņovys i Rogovkys. Eipašī gosti – Aļgirds Klova ar kapelu nu Leitovys.

Tautys muzykants A. Rancāns (1929–2014) sovys vijūlis spēlis aktivuokūs godus ir pavadejs Baļtinovā, apcīmuodams apleicīnis muzykantus, pīraksteidams melodejis, kai ari spālādams Baļtinovys i Upītis kapeluos. Partū nūmetnis reikuošonai pīmāruotuokuo vīta izalaseita taišni Baļtinova. Nūmetnis nūdarbeibu ītvarūs golvonū repertuara daļu sastuodeis Andreja spālātuos melodejis. Sūpluok tam, eipaša lūma tiks īruodeita spēlis styla, maneris i soveiguokūs pajiemīņu apgivei. Nūmetni i koncertu organizej Latvejis Folklorys bīdreiba sadarbeibā ar Baļtinovys nūvoda pošvaļdeibu, atbolsta VKKF.