Velomuzyka leikumu leikumim Latgolā

Velomuzyka leikumu leikumim Latgolā

Rokstu sagataveja: portals lakuga.lv

25. junī nu Kūku dzeļžaceļa stacejis startēs “Velomūzika 2019”. Jau deveitū reizi muzyki, akteri i leidzbraucieji meis pedaļus i maineis muzyku pret naktssātu. Itūgod Velomuzyka izavieliejuse sovus ceļus i stygys meklēt Latgolā, informej “Velomūzika”.

Velomuzykā pīsadaleis jau cytūs godūs satyktī – bundzinīks Juris Kroičs, tausteņinstrumentu puorvaļdnīks Kaspars Tobis nu “Dzelzs vilka”, gitarists Māris Bīmanis, Latvejis Nacionaluo teatra akteri Kaspars Zvīgulis, Arturs Krūzkops i Ilze Blauberga, kai ari muzykis Kārlis Kazāks. Itūgod muzykalajam kolektivam dsavīnuos basgitariste Maija Ušča i gitarists Aivars Vaišļa. I nikod jau navar zynuot, kaidi vēļ puorsteigumi pīsavīnuos poši!

Da ituo Velomuzyka ir pīveikuse 4000 kilometrus pa Latvejis attuoluokajim nūvodim, izalosūt mozuokūs ceļus i aizaugušuokuos stygys, kas vad iz vyssmukuokajom vītom i nūtikšonom. Pīdzeivuoti vaira nakai 60 koncerti naktssātu vītuos i vēļ naskaitomys muzykalys šaļtenis ceļā. “Bet myusim nav gona! Velomuzyka ir palykuse par myusu aizaraušonu. Latveja – par daļu nu myusu pošu. Velomuzyka mums kotram i kotram satyktajam cylvākam nūzeimoj koč kū cytu. Maņ tei ir saaugšona ar sovu zemi. Ar sovejim,” tai muzykalū ikvosorys pīdzeivuojumu aproksta tuos dalinīks Kārlis Kazāks.

Nūgiuņ Velomuzyku tuos ceļā, bet, ka tys nav īspiejams, tod vīnkuorši puorskaiti ituo gods maršruta pīturys punktus. Tī ir šmuki i eipaši vuordi. Tuos ir pīpiļdeitys i napīpiļdeitys sātys. Tuos ir vītys, kurys mes gribim satikt – pyrmū reizi ci jamuos atsagrīzt. Nalels īskots Velomuzykys braucīnī 2013. godā – www.youtube.com/watch?v=ZkdN0ypXZaE.

Kūkys, Dīveni, Rāksola, Margitova, Zablūdnīki, Arendole, Nīdermuiža, Kozupi, Ārdava, Fintmuiža, Lopoti, Kuņdziniški, Soleimi, Puorpuci, Obročnaja Statja, Dorotpole, Pipiri, Padari, Rubinauci, Svarinci, Škrjabi, Namjoti, Idzepole, Fedorki, Pracapole, Tribuki, Iudri, Felicianova, Cybla, Franapole, Ierzeļova, Perekli, Lapatnīki, Īrubine, Sausinīki, Nūmierne, Svātyune, Čūdarīne. 

Velomuzykys koncerti:

25.06. Atašīnis Annys sātā;

26.06. Vacvuorkovys Aņdeņūs;

27.06. Aulejā, keramiķa Veceļa sātā;

28.06. Indrā, Laimis muzejā;

29.06. Bukmuižā, Ezernīkūs pi Ješa azara;

30.06. Martišūs pi Isnaudys tautys noma;

1.07. Malnovys šmakovkys muzejā;

2.07. Upītis tautys nomā.

Ituo gods braucīņa laikā, taipoš kai īprīkšejūs godūs, Velomuzykys koncerti sevkuram interesentam byus pīejami bez moksys. Koncertu suokums ap 20.00 stuņdem.

Velomuzykai varams sekuot socialajūs teiklūs: www.facebook.com/velomuzika, Instagram; Twitter.