Rokstu sagataveja: portals lakuga.lv

Pošlaik Latvejis regionūs nūrit apjūmeiga akreditātūs muzeju prīškmatu digitalizaceja – muzeju vierteibys teik fotografātys, skenātys i padareitys daīmamys škārsteikla vidē. Nu 15. da 17. juļa Kulturys informacejis sistemu centra specialisti sadarbeibā ar Latgolys Kulturviesturis muzeja (LKM) darbinīkim div dīnu laikā digitaliziejuši 1150 kruojuma prīškmatus, informej LKM kruojuma nūdalis specialiste Evita Kozule.

Itūs dīnu laikā augstys kvalitatis attāli īgiuti LKM asūšajim prīškmatim nu latgalīšu literaturys i tekstileju kolekceju. Fotografātys tyka ari Livonejis laika monetys, kurys da ituo varēja apsavērt vīneigi muzeja pastuoveigajā ekspozicejā “Rēzekne laikmetu griežos”. Niu juos sevkuram interesentam byus apsaveramys ari Nacionalajā muzeju kruojuma kūpkatalogā (www.nmkk.lv ) kūpā ar cytim digitalizātajim prīškmatim.

Fotografi Miks Užāns i Sintija Selicka atzineigi nūviertiejuši LKM specialistu attīksmi. Vajadzeigī prīškmati atlaseiti i salykti vīnuvīt vēļ pyrma jūs īsarasšonys. Ari kluotīnē nūtykuse aktiva leidzdarbuošonuos, kas atvīgluoja i pauotrynuoja dorba procesu. Digitalizaceja teik veikta ERAF projekta “Kultūras mantojuma satura digitalizācija (1. kārta)” ītvarūs. Projekta laikā da 2021. gods paradzāts digitalizēt 68 000 prīškmatu nu Latvejā akreditātūs muzeju kruojuma.