Roksta autors: portals lakuga.lv

9. junī Storptautyskuos suomugru jaunatnis asociacejis organizātajā vebinarā Latgalīšu kulturys ziņu portala lakuga.lv redaktore Vineta Vilcāne stuosteis par latgalīšu volūdys situaceju myusu dīnuos i aktivitatem volūdys atdzeivynuošonai.

Storptautyskuo suomugru jaunatnis asociaceja apvīnoj dalīnikus nu Krīvejis, Igaunejis, Suomejis i Ungarejis. Organizaceja dorbojās jau nu 1990. gods, i tuos mierkis ir atbaļsteit Uralu tautu volūdu i kulturys atteisteibu, styprynuot sadarbeibu storp dažaiduos vaļstīs i vītuos dzeivojūšajom Uralu tautom, kai ari aizstuovēt pyrmīdzeivuotuoju interesis.

Darbeibys ītvorūs asociaceja eistynoj ari izgleiteibys programu, kurys mierkis ir popularizēt Uralu tautu volūdu i kulturu i cytus aspektus. Tykuši reikuoti vebinari par Uralu volūdom, Uralu tautu kulturu i viesturi, par dažaidu pasauļa volūdu saglobuošonu, atdzeivynuošonu i cytim vaicuojumim, portalam lakuga.lv nūruoda organizacejis puorstuovs Artjoms Malihs, pībylstūt, ka dažaidu volūdu lītuotuoji sasakar ar leidzeigim izaicynuojumi i vīns nu ūtra var vuiceitīs, kai ar tim tikt golā.

Organizaceja jau īprīšk reikuojuse vebinarus par sābru vaļstīs lītuotajom minoritašu, regionalajom i mozuoklītuotajom volūdom. Majā muzikis i viesturnīks Arņs Slobožanins stuosteja par latgalīšu volūdys viesturi i statusu myusu dīnuos.

Škārsteikla nūdarbeiba “Latgalīšu volūdys atdzeivynuošona” nūtiks angļu volūdā 19.30 stuņdēs (Reigys laiks). Nūdarbeibai juopīsaregistrej vītnē mafun.clickmeeting.com/latgaliski/register.