“Borowai Mc” jauns sings i video

“Borowai Mc” jauns sings i video

Rokstu sagataveja: portals lakuga.lv

Grupa “Borowa Mc” klauseituojim nūdūd jaunu singlu “Tu vari”. Tam uzfilmāts ari video. Grupa suokuse dorbu pi jaunuo albuma, kū plānoj pabeigt i īraksteit tyvuokūs mienešu laikā, portalam lakuga.lv atkluoj grupys dalinīks Aigars Runčis.

Par dorbu pi jaunuos dzīsmis, gon par tūpūšū albumu grupa izasoka, citejūt dzīsmi: “Ka tu vari, tod tu dori! Kai maratonā – asam puorvariejuši sīnu i īvylkuši ūtru elpu, i, uzjamūt tempu i apgrīzīņus, dūdamēs preteimā jaunajam!” Dzīsme “Tu vari” ir kai skaitompaņteņš, kū atkuortuot ceļā iz jaunim sasnāgumim, atzeimoj A. Runčis.

Jaunuos dzīsmis video radzama laikmeteiguos dejis doncuotuoja i horeografe Agnese Bordjukova, kura dejā izstuosta sovu interpretaceju par dzīsmi. Taipoš video radzams, īspiejams, smukuokais saulrīts Latgolā. Video ir filmāts Latgolā – Iudiņa turisma atteisteibys centrā “Bāka” i Felicianovys muižā. Video autors ir Artūrs Valdmanis.

Dzīsmis “Tu vari” muzykys autori ir Arcadia 87 i Guntra Kuzmina-Jukna, teksta autors ir Aigars Runčis, producents – Arcadia 87. Dzīsme daīmama “Spotify” i cytūs muzykys straumiešonys servisūs. Tū var nūsaklauseit i bez moksys lejupīluodēt ITE.

“Tu vari” ir jau ūtrais “Borowa Mc” sings itūgod. Piec puora gods klusiešonys majā grupa izdeve atsagrīzšonys singu “Doncoj ar mani”, kas īzeimuoja paviersīni grupys skaniejumā, par tū pasaryupēja muzykys producents Arcadia 87.

Grupa “Borowa Mc” dybynuota 2004. godā, i izdavuse treis studejis albumus. Grupā dorbojās Aigars Runčis, Guntra Kuzmina-Jukna i Ingars Gusāns.

Print Friendly, PDF & Email

Nūtikšonu kalendars