Rēzeknē byus Monsinjora Nikodema Rancāna 150 godu jubilejis atceris pasuokums

Rēzeknē byus Monsinjora Nikodema Rancāna 150 godu jubilejis atceris pasuokums

Rokstu sagataveja: portals lakuga.lv

Svātdiņ, 13. septembrī, 14.00–15.00 stuņdēs nūtiks goreidznīkam, rakstnīkam, Latgolys atmūdys kusteibys darbinīkam, Latvejis viesturis pietnīkam, Rēzeknis Vaļsts školuotuoju instituta direktoram monsinjoram Nikodemam Rancānam 150 godu šyupeļa svātku jubilejis atceris pasuokums pi jam veļteituo pīminekļa, Rēzeknis Tehnologeju akademejis (RTA) ākys prīškā, viesteits RTA Facebook.com profilā.

1994. godā pi tūreizejuo Vaļsts Školuotuoju instituta (niu RTA) tyka īlykts pamatakmiņs Nikodema Rancāna pīminekļam. Tūreiz atmiņuos dalejuos kaida nu N. Rancāna škoļneicu: “Nikodems Rancāns cīš mīlēja cylvākus, eipaši sovus audzynomūs. Kaidu dīnu apmekliejs kūpmītni, kur dzeivuojuši juo studenti. Meitinis asūt darynuojušys rūkdorbus – kaida adejuse, cyta izšyvuse. Monsinjoram tys asūt cīš patics, jis juos asūt paslaviejs, bet, paceli īmūt, pasacejs: “Raunit, raunit!” Meitinis bejušys sajiusmā i nūrunuojušys, ka iztamborēs jam šali, bet dīmžāļ nūdūms nav pīsapiļdejs, partū ka Nikodems Rancāns pieški aizguojs myužeibā.”

N. Rancāns beja Rēzeknis Vaļsts školuotuoju instituta direktors 1929.–1933. godā, instituta duorzā kūpe i audzēja dažaidus zīdus, bet juo vysmeiluokī zīdi bejušys boltuos lilejis. 2002. godā tyka atkluots N. Rancānam veļteitais skulptoris Inesis Evaldis radeitais pīmineklis “Sadegdams pats, deva gaismu citiem”.

Atzeimejūt monsinjora 150 godu dzimšonys dīnu, Rēzeknis Tautys lītiškuos muokslys studejis “Dzīpariņš” meistaris darynoj šali, kū atceris pasuokumā pi N. Rancāna pīminekļa duovynuos RTA.

Print Friendly, PDF & Email

Nūtikšonu kalendars